​
  Goeiëndag door 00X & 00Y​

2021
November 2021 (00Y)
Beste videovrinden. Et e even geduurd moar na anderalf jaar mochten we wee een clubavond ouen in “Ofzicht”. Iereen weer bliè dat we weer bie elkaar mochten komen. Et was moar een saai joar, woarin nie vee te beleven viel. Er woarn toch we vee beperkingen. We gingen van den enen lockdown naor de anderen. Er waoren vee zieken en de ziekenhuizen loagen vol mee corona patienten. Nu zien we weera aan den vierden golf bezig. En ik denk da dat nog nie den lesten is. Die corona tied eeft ons oak wat leden gekost, da’s we jammer, want het cluppie word dan wel kleiner.

Oak goan we volgend jaor naar 1 clubaovond in de maand. Et prograama is steeds moeilijker om in mekaar te zetten en de leden opkomst op de clubavond is ook niet zo groot. Moar het prograama wa gemoakt is zit we goe in mekaor.

Moar zoals we op de cuboavond ebben gezien, werd er toch we ve gefilmd. En ebben we toch mooie films gezien. Soms al eerde opgenomen , maor loater gemonterd. Onze eerste cluboavond in september was de uitgestelde jaorvergadering, da was weer even wennen om elkaor wee te zien. Den 2en gaf Leen een uitleg om eens op een andere manier een film te goan moaken. De 3e aovond gaf Frans een uitleg over het filmen van een trouwparty. Da is best nogal ingewikkeld. Maor Frans gaf goeie tips. Dan adden we de lange filmoavond, met 4 mooie films. Jammer dat er maar zo’n weinig leden waren om ze te bekieken.

Den volgenden aovond was gepland voor de ZEEVA clubwedstijd, maar helaas moeten we weer in lockdown en moet “ofzicht”  s avons dicht. Moar et ele gebeuren is naor vlissingen veruist, zoda toch iedereen, die ingestuurd et, zijn film gejureert te zien krijgt. Da is jammer, de volgende 3 weken kan er dus geen clubaovond zijn. Opelijk bluuft et ier bie. 

En kunne we volgend joar toch wee het mooie programa, da gemaokt is, ook uutvoeren. We goan nu naar de erfst en winter en er zijn toch veel mooie plekjes om te goan filmen, mee mooie erfstkleuren. Wa minder toertisten, dus nie te vee mensen die voar je lens loopen. Want die waren er deze zomer eel veel. Zeeuws vloanderen was erg in trek bie de duitsers en belgen. Moar ook nederlanders die nie noar het butenland durfden, vanwege al die regeltjes ivm corona.

Ik eb in et prograama overzicht (red.: op de website) gekeken en doar stoat Pro Hide op. Iermee kun je de storende obstakels wegpoetsen. Net as in fotoshop.
Da zou we mooi zin, want der wor nogal eens voor de camera gelopen.

Binenkort ebben we de clubwedstrijd, maor daor zijn nog nie eel filmpjes voo. Et is we kort dag om nog wa te goan filmen, maor je kunt er al over dinken om een filmpje voo volgend najoar te maken. Et zou jammer zijn dat di nie meer door zou gaan. Dus de oproep is, ga met z’n allen er eens op uut om nen mooie film te moaken.

Doe de komende weken voorzichtig, en probeer nie ziek te worren. Dan zien we mekaor op de volgende clubaovond 
Mee groet van OOY

2020
April 2020 (00Y)
Beste videovrienden. Amai, da was een abrupt ende van onze clupaovonden. 10 mѐrte was den lèsten aovond. en we adden der nog 3 te gaon. Komt der zo’n virus voorbie en gooid alles in het onderd.
En aongezien we allemaol in de risicogroep beooren, ister maor een conclussie, stoppen mee alles.
Lekker binnen bluvven zeggen de “gelleerden”. Bie ons in zeeuws vlaonderen is da nie zo’n probleem, de meesten van ons ѐbben wel een tuintje om in rond te scharrelen. We zitten ook dicht bie de zée, dus een wandeling kunnen we allemaol wel maeken. Vanaf Perkpolder, de boulevar in Terneuzen, de braakmanbossen, haoven in Breskens, het zwin in cadzand. Overal is wel te zien, wat de gevolgen van deze periode zijn. Wandelen op anderalve meter kan daar nu wè, want vee bezoekers heeft zeeuwsvlaanderen nu nie
Een filmpje maoeken over corona crisis  zou oak nog kunnen. Vee vakantiefilms zullen der nu we nie komen. Moar ik oop we, da we in juni toch een beetje meer armslag kriegen. Nie te vee, moar een klein bietje meer.
Apart om te filmen, de nu lege straoten, mensen die anderalve meter uut elkaaor loapen. Ook in de supermarkt. De beertjes voo de raomen, de stoep tekeningen, de vogeltjes die fluiten, die kunde nu goed ooren, want het is eel erg stil overal. Bie et monteren zoude allerlei dingen kunnen uutproberen, om er iets leuks van te maoeken. In et programma zitten diverse dingen die er toch iets aparts van kunnen moaken
Ik wil judder niet oan het werk zetten  oar, maar in september, as we weer oan de clubaovonden kunnen beginnen, ebben we toch weer fimpjes nodig om te biekieken. En misschien wel truukjes bekieken die judder ebben toegepast,
Ik oop da judder de zomer goe doorkomen, zonder corona.en da we mekaor wee in september zullen zien
Pas goe op judder zelf, en ou afstand … anderalve meter!!
Mee groeten van OOY

2019
Juli 2019 (00Y)
Beste OOX en videovrinden. Et was de secretaris opgevallen da OOX en OOY in 2018 niks van ulder ebben laoten ooren.
We adden een sabbaticul gehouden, maar dan laot ik me natuurlijk nie kennen. Vandoar da’k weer achter de computer ben gekropen om wa op te schrieven.
Was ulder da oak opgevallen? Misscien nie, want ik weet nie wie allemaol die stukskes lezen. Weet dan oak nie of ulder ze gemist ebben (ge mag ier altied op reageren natuurlijk).
Net zoals vee ouderen heb oak ik het altied druk. O.a. van vekantie trugkoomen of weer weg gaon.
Of gewoon even niks doen. Da is soms ook wel es plezant. En in de buurte is ter in de zomer ook altijd vee te doen.
Trouwens ik was op vekantie in een eel toeristisch pleksken en ad even geen zin om te filmen. Ik wilde de stad, gewoon eens bekieken, zonder steeds maor op mooie plekskes en camera standpunten te letten. Weet ge wa me opviel? In al die drukte eb ik 2 mensen mee een videocamera gezien. De rest allemaol mee z’n telefoon aan het fotograferen of filmen. En die filmen maor lukroak weg. Die kieken nie naor standpunten etc. Zijn we dan toch een uitstervend ras? Moar eenmaol in die mooie stad, ak eigenlijk wel spiet d’k mien camera nie mee had. Maor ja, gedaone zaken kunde nie terugdraojen. Die camera lag nog in et hotel en da was toch nog 3 kwartier mee den trein rijden.
Maor op andere plekskes eb’k wel mooie plaotjes kunnen schieten. Da zulde van de winter nog wel zien.
Maor oe ebben judder de zomer deur gebrocht? Ook vee kunnen filmen? En ebben judder nog iets kunnen gerbruuken van hetgeen we op de clubaovonden ebben geleerd?
K‘oop van we, want dan valt er in et volgende seizoen vee te bekieken en bespreken
Trouwens er zien we mensen die van de zomer gefilmd ebben, da ebben we in de nieuwsbrief van de secretaris gelezen. Leen en z’n team ebben weer de Ride gefilmd. Da is weer eens mooi gedaon. En da allemaol mee da slechte weer. Camera standpunten van beneden af, waoren er nie bie, maor da kan oak nie anders, plat op de buuk in het gos, was geen optie. Wel af en toe een spetter op de lens, maor da oort er oak bie. Ebben judder de film oak al gezien, wel kieken oor, der valt atied wa van te leren.
Mee die werme daogen, kwam et er nie van om wa te monteren, maor we heeben nog biena 2 moanden voorda de cluboavonden wee beginnen. Dus da moe goe kommen. Voo deze keer was het da weer. Tot ziens in september.
Mee groet van OOY.

​​2017
December 2017 (00X) Goeiëndag 29
Goeiëndag. Alo ama. Ank iirluk ben wasut mun ema ontschoten dank belooft a om af en toe is un stukje te schrieven.
Ma noe kreeg ik un telefoontje van dien Cor, ij zei, luuster wen net un bestuurs vergadering  gat en noe docht ik dien 00X edoek al un poos niks mee van zun eigen laoten ooren, en wees eerluk dat adden we nie afgesroken, jie e zelf gevraogd of ai af en toe is un stukje mocht schrieven dai via mien deur zou sturen an dien secretarus.
Dus noe kank dur natuurluk nie onderuut om weeris wa te gaan schrieven, in doope dat judder dur wadan vinnen.
Zo da was a un begin, ma noe moek dur we wa van zien te maoken.
Zo an judder weetun stuur ik altied mun stukjes via dien Cor om te zurgen da dik nie bekend zou oren, da is a van a tie nog voozitter was, da ank toen is mee um besproken, dank wè stukjes wou schrieven ma nie bekend wou ooren en dank dus die stukjes via em wou insturen, da was tie ut mee iins en da ga nog steeds zo.
Ma noe ank un stukje geschreven en an um deurgestuurd, ma da was nie na zun zin, dus è tie mien opgebeld en ebben we un poos an de telefoon gangen tot da we der uut waren.
Kiek mensen da iit samenwerking, wan oe ai toek bekiekt ij a gliek da was noe gin stukje zo ank die anders altied schrief, dus oe ai toek bekiekt kga tur toch wee tegenan moeten om een ander stukje te schrieven mee wè tselfde nummer, dus gewoon opvolgund.
‘k ben begonnen mee alles wa nie goed was en waa we ut deur de telefoon over iins waren duruut te gooien en noe benk bezig dur toch wii un fasoenluk stukje van te maken.
Eigenluk e tie mien overtuugt deur te zeggen da we op de Videoclub toch oek mekaars films bespreken om dur beter van tooren en da konk gin speld tussen kriegen, das gewoon wa.
Dus mee di aan judder deur te geven enk intussen wii a un iil stuk geschreven en ik oef oek nie alles weg te gooien, wan judder weten toch nie wank veranderd èn.
Je moesten mien noe eens zien zitten, wan ik moeter toch om lachen dank deur dien Cor zun kommetaar noe un vee beter stukje an het schrieven ben.
Zo a judder toch oek we a weten ben ze wee bezig om zon filmfestival in Zeeland torganiserun zo ank begreep van dien Cor an dun overkant. Net zo a we un iile poos geleejen in Terneuzen èn gat 
Da betekunt nutuuluk wè da wudder da na toe moeten a ta zo ver is.
Ma iirluk is iirluk dun vorige keer zien die overkanters toch oek naarons moeten kommen waa of nie en at goed is kommen ze daar uut iil Nederland na toe, zo ank begruup zeker un paar onderd mensen.
Kwou eerst schrieven un paar onderd MAN, ma da is nutuurluk nie wa, da ben zowel vrouwen as mannen.
Ja oe aitoek draait of keert da kom je nie onderuut en da oef van mien oek nie oor, voo mien zien vrouwen en mannen gliek en da moei noe oek wii nie verkeerd begrupen ik weet echt oek we da taa verschil in zit, ma da bedooelde ik nie ank zei das su gliek zien.
Maa daa gaak nou nie verder op in wan da weten judder vast oek we.
En ik kom da op de klup echt nie uutleggun wan dan weten judder we gliek wien ank ben en wan afgesprokun dat we da nie zouun doen. Zo tis wii genoeg vo deze keer dus zeg ik totoorens.
Judder 00X

Juni 2017 (00X) Goeiëndag 28
Goeiëndag. Alo ama. Dis noe nie presies de tiet dank un stukje zou schrieven, wan ieduriin is mee vakansie, of te wé dur is in deze tied giin videoklup. Ma noe oor ik un bitje gedwongen deur dien Cor.
Zo an judder weetun stuur ik altied mun stukjes via um om te zurgen da dik nie bekend zou oren, da is a van a tie nog voozitter was, da ank toen is mee um besproken, dank we stukjes wou schrieven ma nie bekend wou ooren en dank dus die stukjes via em wou insturen, da was tie ut mee iins en da ga nog steeds zo.
Zo a judder toch oek we a weten ben ze wee bezig om zon filmfestival in Zeeland torganiserun, zo ank begreep van dien Cor an dun overkant.
Schienbaar is tur a iets gewist en daar atie op gereageerd.
Volgens een mail van hem an mien a tie iets geschreven, da kai ieronder lezen, wan da atie daarna an mien deurgestuurd, wan da ging oe kun bitje over mien:
Hallo allemaal, 
Kijk deze stappen zijn dus gezet en zo te lezen succesvol.
Bij ons in de club zit iemand die af en toe stukjes schrijft in het Zeeuws.
Die persoon zou volgens mij zeggen “Wudder Zeewun kunnen dat oek oor”.
Ik ga dat toch even aan die persoon doorgeven.
Groetjes,
Cor
Nou da von ik zo leutig dank direct wii in aktie geschoten bin om da an juder deu te geven op mien manier.
Zo tis wii genoeg vo deze keer en totoorens.
Judder 00X.

Mei 2017 (00X) Goeiëndag 27
Goeiëndag. Alo ama, tis wiira un poosje geleejen, en om iirluk te zien was ik het weer is iilemoa vergeten, ma noe et te krante mu golpen om dur wii an te dienken. Dur ston naomuluk un stuk in over un festival an dun overkant en dat iiten “Hrieps”, waa da voo sta weet ik echt nie, maar da ston wadin op zun zeeuws dank wè iil leutig von “Hewoon as Oaltied” , volgens mien is da op zun overkants geschrevun, en betekunt da “gewoon als altijd” ma da speel gin rol, ut dee mien dur weer an dienken om voo judder un stukje te schreivun, dus noe gaank mun best doen om dur wii wa van te moaken.
Dun vorige keer enk wa geschreven over onzen Leen Muller, die at un film gemaakt over “Zeeuws-Vlaanderen, op de grens van land en water” en die film zou in da Cine City theater in Terneuzen draaien, nou daar ettie gedraaid oor, vozeverre an ik geinformeert ben was op een gegeven moment de zaal propvol en dur stonnen der nog een iile boel te wachten (waavan ik er iin iiiil goed ken, dus da enk ut van!!), ma die konnen dur natuurluk nie meer in wan de zaal was vol, en da stai dan.
Nou gloof ut of nie, toen en ze die mensen in een andere zaal gezet en daar et die film oek gedraad??? oe dan kan weet ik nie. Maa zijn ze wè tegeliek gedraaid!!!!! Maak ta mee mensen en dien Leen is dus un lid van onze clup éé!!!!!!!!, da kunne we dus nog wa van leren zouk zeggen.
Dus bie deze de vraag an die commissie dia an altied het programma maoken, vraog is an dien Leen of a tie ons dao is iets over wil vertellen.
Kiek ik zitten oek al un poosje op de club, en ik zien toch regelmatig films waaran ik van dienk “petje af” da zou knie kunnen.
Ma noe ank daarus goed over deur gedocht èn, zit ut volgens mien meer in ut kriegen van goeie ideeun en datan uut werken (ahum oe zeik da).
Kiek en da gaatut volgens mien om, wan filmen kunnen de meesten bie ons op de club wè redeluk en dur dan oek nog een filmpje van maoken lukt oek wè, ma noe kom ut “WA GA JE FILMEN”. Of te wel IDEEEN!!!!!
Noe gaank is uutdagend doen, ik zou zeggen tegen de leiding: “Kom op mee un cursus die adons op iedeeen briengt.” Zo tis wii genoeg vo deze keer en totoorens.
Judder 00X

Maart 2017 (00X) Goeiëndag 26
Goeiëndag. Alo ama, tis wiira un poosje geleejen, ma da benk wii oor, ma da kom eigenluk weer deur, ja je weten ut à zekers, dien Cor, en iirluk is iirlun ij a gliek, ij at tur al un iile tied niks over gezeid, dus ik docht tmoe nie mii zeker, maa ij è me uut de brand golpen, ij zij “ik moe joe toch nie zeggen of je un stukje moe schrieven, da moe uut jezelf kommen, das tog vee leutegur en ij von dan ik da best we leuk dee, dus da was vanself wèl un opsteker.
Dus enk mun eigen voo genomen om weerus an de bak te gaon.
In noe ma wii afwachten of da judder dur wadan vinnen, ma da doop ik wè natuuluk. Ma noe kom ik der gliek achter daj mee vòò nemen nog giin stukje è. Dus noe gaank even stoppen om dur is over te dienken wankur wiiris van ga maoken, wan noe enk nog giin idee, ma da kom wèloor.
Ja oor kèn wa, da ga over Leen Muller, ja onze Leen van de Videoklup. In da uus an uus blad ScheldeXpress staot un iil stuk over Leen en zun film, wan die kom op zaterdag 8 april om 11 ure in da Cine City theater in Terneuzen. Die film iit “Zeeuws- Vlaanderen, op de grens van land en water”, das wa ee, dus mensen da moe me wè na toe ee, da liek me iil gezellig toe en Leen kan goeie en mooie films maoken, dus ik dienk dat ta wè goed zit. Ken, via dien Cor, die trailer bekeken, jongens, jongens (en meisjes natuuluk), dadis wa zeg, krieg ta voomekaa, kgaan daor zeket na toe da gaank nie missen, koopen juddewr da oek ama te zien. Zo vo deze keer gaonk ut tur wii bie laoten en tot oorens. Judder 00X

2016
December 2016 (00X) Goeiëndag 25
Goeiëndag. Alo ama, da benk wii, ma da èn judder te danken aan 00Y, wan ik las in da stuk van de sikrutarus, over da filmfestival in Sas van Gent, oek un stukje van OOY, en toen docht ik gliek ja OOX jie è dal un iilun tied niks van juneigen laoten ooren en da kan vanself nie, jie bentur mii begonnen en noe zou jafaken, da ka natuuluk nie, en dien Cor è doek nog niks laoten oren en das bijzonder, dus benk ma wiirus in de pen (sorry, achter mun toetsen bord gaon zitten) dus noe moek wè.
In diirste plekke vanself mien ekskuzus dank zolange op mun eigen èn laoten wachtun, ma noe gaank dur wii tegun an oor.
Ma wa gaank ut noe is over èn? O ja, 00Y schreef na dandere leden udder camera gekekun tèn, in doope uut te vinden wienan ik ben. Kiek da gaank eigenluk al een bitje omdak gezeid èn dank un camera à van un merk da mii un S begon.Da was eigenluk un foutje, wan noe is de groep waarank bie kan oren al un bitje kleiner gooren, ma dadenk an mun eigen te danken. Ma om iirluk te wezen is die groep noe nog zooo groot dat ut nie mee za vallen om mien daaruutaalen en dan natuurluk nog de vraog of ik een jongetje of un meisje bèn!!!!!!!!!, jè nog wè werk oor.
Nou 00Y kmoen zeggen da ta wè un slim trukje was, alliin gaak noe vaself nie zeggen of ik dur bie was of nie, dus dadonderwerp kom in di stukje natuurluk nie voo, da sulje begruupen, dus zouk zeggen gao rustig deur mii uutzoeken wien ank bèn, aliin de kans daj da te weten kom is volgens mien iil, iil, iil, klein, maa je wiit ma nooit.
Mien stukjes gaon altied, zo as afgesprokun via dien Cor na dun sikrutaris, dus ij is dun inigstun die weet wienank ben, oek di sikrutaris weeta nie, wan ik èn mii dien Cor afgesproken da niemand ut mag weeten, wandan kan knie meer zo vrijuluk schrieven as ank da noe kan doen, en das vee leutegur, en ik doen oek altied mun best om niemand zeere te doen, ut moe wè altied fusoenluk bluuven. 
Weetje wa me dun leste tiet opval, datter wii nieuwe leden biekommen, dur ben dur biegekommen van dien cursus die an dien John en Cor èn gegeven, ma oek nog anderen, vo zover ik ut begrepun èn nog wii mensen uut België, kiek da vin ik noe wii leuk, wan we zitten ier toch eigenluk dichter bie België dan bie Olland.
Kweet nie of die Belgische leden die an dur al un poosje biezitten en die an oek un bitje kunnen filmen, wa zei ik een bitje!!!, dur un bitje tussen zitten mee ut anbriengen van die nieuwe Belgische leden weet ik nie, ma van mien mogen ze dur nog wè een stelletje meenemen.
Wan zo ank à zei wudder Zeeuws Vlamingers kunnen ut altied iil goed vinden mee Belgische Vlamingers, wan zoank à zei wudder kunnen iil goed mee mekaar akkediiren, dus vo mien zien ze iil welkom.
Zo mensen voo ank dur mee gaon stoppen, vo deze keer, wil ik nog graag de wens uutspreken da we weer iil vee mooie films mogen zien van onze leden, wan iirluk is iirluk, oek al ben ik dan nog nie zon echte kenner, volgens mien gaote kwaliteit toch vooruut.
Mun volgend stukje za wè int volgende jaor zien dienk ik, dus wens ik judder ama avast het allerbeste in ut nieuwe jaor en iil vee film plezier. Zo vo deze keer gaonk ut tur wii bie laoten en tot oorens. Judder 00X 

December 2016 (00Y)
Beste OOX en videovrinden. Et is wee even gelejen da’k een stukje geschreven heb. Inmiddels ebben we weeral 6 cluboavonden achter de rug. En daor is weeral vee in gebeurd. Maor ik wil nog even terugkome op de brief van OOX. We weten nog steeds ni wie et ta is. Nou dacht ik et te weten, omdat ie nen nieven camera ad gekocht, die begon met een S. Op de cluboavonde es rond gekeken, maor nou ebben diverse leden nen nieven camera gekocht die mee een S begint. Dus weten we nog steeds nie wie ter agter OOY zit. Et bluuft dus een roadsel.
Moar nu even over de cluboavonden, die zijn toch wee reuze gezellig en mee vee informatie. Den eesten keer, in september, was ter vee informatie van de bestuurders. Ze ebben vee plannen. Mee  diverse onderwerpen op de clubaovonden. En vee ideen om films te goan maoken.
Nen extra clubdag op zoaterdag over DNA van de camera. Wa ze dor mee bedoelen da ebben we gezien op dien dag. Iedereen liep mee z’n spullen te sjouwen om alle trukjes te doen. Iedereen vond dit plesant en at der vee plezier in, en men was mekoar oak oan het elpen. Da vondt dien cursusleider eel biezonder, want da zag tie nie altied. Dan ben k we benieuwd of we doar resultoaten van goan zien in de komende filmpjes...en wa vonde judder van de thema film van “Mooi zeeuws vloanderen”? Jammer da ter moar 4 films woaren. Goan judder volgend joar we mee doen? We ebben een joar den tied en we zien der even mee buuten. 
Dan even over den clubavond mee de clubwedstrijd. Da was oak gezellig, oak het diner vooraf was eel leuk, mee vee mensen, om even op t gemak een babbeltje mee te moaken. Leen ad den ooftpries, en onze belgen den tweeden, joa nie iedereen kan winnen, moar as ge maor mee vee plezier oan uwen film ebt gewerkt, dan is da toch eigenlijk oak een priesje waart (maor dan voor jezelf).
Dan eben we natuurlijk nog nen wedstried nl. van de ZEEVA. K ben benieuwd oeveel films doar voar zien. Das wel nen belangrieken wedstried want de winnaer mag naar et NOVA festival. Dit jaor was da Sjaak Keijmel en die was der wa pront op.  Laot ons oak even ons best doen om nen schoonen film te maoken, waor we mee kunnen pronken op het festival.
Der rest ons dit jaor nog enen clubvond en dan is ter weer een joar voorbie.
Dan wens ik jullie alle goeds voor 2017, een goed videojaar met vee mooie opnoames. Tot op de volgende cluboavond.
Mee groet van OOY

Juli 2016 (00X) Goeiëndag 24
Goeiëndag. Allo ama, tis wiira un poosje gelejen dank wa èn geschreven en noe wiiris iilemaal uut mun eigen. Ma om iirluk te zien kom ut tog wii un bitje deur dien Cor en da kom omdak um wii tegen kwam in Ulst, ma ei è niks over un stukje gezeid, ‘k dienken omdatut vakansie tied is. Ma da dee mien dur we weer an dienken om een stukje te schrieven, en da bink noe mee bezig.Ei zij dattie net terug was van een kroes na Noorwegen mii zo’n groot schip, ei è nog gezeid welkun, ma da week nie mee.
Kvroegen, gaai da un film van maoken, ja zeitie ma vô mun eigen, kèn 2 en un alf ure opnaomen, ma kdienken dattut un film van 1 ure gadoren.
Kzei das vast wè wa vô de club, ma da wastie ut nie me iins, ze zien me ankommen mii un film van un ure zeitie, nii dagaank nie an beginnen, stel je vô da iederiin da zou doen, dan ben me mee de kerst nog bezig.
Das vast nie bevordeluk vô ut ledental, en das vee belangrieker.
Ja daa konk niks op zeggen wandarettie gliek in.
Ma noe è, wan noe ben zo lekker begonnen ma waa moenk het noe wii over èn, weetje wa, kgaon gewoon stoppen en dan gaak morgen ofzo wii deur mee schrieven dan weet ik intussen wii wè wa.Ja noe enk wii wa, ken namuluk pas un niewe camera, dus die benk ant uut proberen, ma om iirluk te zien looput nog nie zo at moe mee de vooruutgang, ma oek daar et dien Cor, toen ank da tegen um zei, me wa tips gegeven, ma eigenluk komta neer op doen, doen en daarna nogis doen, wan zeitie van doen moeit leren, ai um in de kast la liggen wor je der nie wiezer van. Toen vroegtie wa vor iin ank gekoch an en toen ankzei welkun en da begin mii un S, keek tie mun an en zei waarom ei gin (begin mii un C) gekocht dan ank je wa beter kunnen elpen!!
Nou en noe bink dus echt ant DOEN, ken wella een boel opnamen gemaokt en die kank noe gliek op mun camera terugkieken, da konk bie mun vorigen camera nog nie (ja da kon wè ma dan deur zon mini ruutje waar ank oek deur moest kieken om te filmen, ma da zag je nie echt of ai noe wè goeie opnamen à gemaokt)), ma da was oek a een oud beesje oor. Dus noe oor ik er een bitje meer bie dienk ik dan ma. Dien ouwen camera enk noe an een goeien kennis gegeven, dan kan tie is oefenen en dan kank um mischien we meepraoten na de videoclub, ma om iirluk te zien enk da we un zwaar ooft in, ma je weet ma nooit, dien ouwen (o nii da zouknie mii zeggen) zeg altied “nie geschoten ia altied mis” dus gaank dur gewoon van uut dank noe ank naa dien kennis èn geschoten, ma dattut niks oor omdak nie goed gericht èn ha ha.
Mensen noe enk weeris bezig gewist, wan ken weera meer dan un blad vol, dus gaank dur mii stoppen mii de bekende woorden: Zoo da wast wee voor deze keer. Vee film plezier en tot de volgende keer (za wè na de vankanse wezen). 
Van judder 00X

Mei 2016 (00X) Goeiëndag 23
Goeiëndag. Allo ama, noe ist toch wiira un iile poos gelejen é dak un stukje en geschreven en om iirluk te zien ank dur oek nog ema nie aan gedocht, ma dur zien oek anderen die an da wè an dienken, je kunnen biena wè raaije wien atta dis.
Vanself die ouwen …, oh nee sorry, kzou voortaon Cor zeggen, dadank beloofd, dan moenk dadoek doen natuurluk.
Kwam um toevallig tegen en wadden un proatje over vanallus en na un poosje ja oor da kwam tie. Wa bluuf je mii jun stukjes zei tie, ken dur al un iile poos giin gezien. Nou toen enk um beloofd dank wii in de penne zou kruupen, dus bie deze wii een stukje van mien en koopen dat dien … dur tevreejen mee is.
Trouwens ut seizoen zitter a wii biena op, dan gaon we wii mii vakansie. En je kunnen ut glooven of nie, ma ik kiek noe wiira uut na ut nieuwe sizoen in tachter jaor, wan oek al zien judder zelden is een film van mien en kza zeker gin titels noemen wan dan weten je gliek wie ank ben en da ga vaself nie gebeuren. Ma ank iil iirluk moe zien kvin ut altied iil fijn op de club, ‘kan da nie echt un naom gevun, ma kvoel me daa altied tuus. Da sa tien Cor leutig vinnen dank da zeg, wan in ons praotje van kort gelejen kreeg ik dun indruk, let wè dun indruk, en misschien benk wè ema mis, dat tie ut self dun leste tied wa minder na zun zin ad, ij zatme we nie in dank afnemen, ma ksrieven ut toch wan zo enk dat toch un bitje geproefd, oewel tie niks speciaols è gezeid en ut dus zeker oek za ontkennun en koopen oek da tie tur nie uut aalt. Ma ank iirluk moe sien za tie da wè nie doen, wan ij è nog nooit iets an mun stukjes varanderd, dus za ta noe oek wè nie gebeuren. Noe gaank maaris gauw over op een ander sjapieter, wan ik was even TE seriejeus aantooren, ma wa moenk noe nog is schrieven? O ja, kooren de leste tied wel is van de sommigen dadut ledental achteruut gaot? Nou da snap ik dus niks van, kzien regulmatug nieuwe gezichten dus volgens mien kommen dur juust leden bie, en je moet oek wè bedienken dan nie altied ieder iin dur is. En om dank a un poosje lid ben, enk oek we meegemaokt da we echt minder leden adden, ma ik ent eigenluk alliin ma zien groeijen. Wa willen die bestuurders noe eigenluk, da we straks nie miir in ons lokaal kunnen omdat vol is! Of datur alliin nog staonplaatsen zien (ha, ha) of da degenen die an achterin zitten ut beeld nie mii goed kunnen zien omda se biena an dun uutgang zitten, das tochoek nie leutig. Nii mensun gloof mien noe ma, mee onze clup zitta wè goet, en ik draaiun a un poosje mee, dus ik kant weten (zo da enk even gezeid). Ma let ma op mun woorden en bluuf om je een kieken (op de club) da zit echt wè goet. Kiek is an noe enk stiekum toch wii tiin en ander geschreven, dus enk wii an de verwachtingen van dien Cor voldaan (oop ik) dus gaank dur mii stoppen mii de bekende woorden: Zoo da wast wee voor deze keer. Vee film plezier en tot de volgende keer.
Van judder 00X 

April 2016 (00Y)
Beste OOX en videovrinden. Et is even gelejen maor et wor tied om nog nen keer wa te schrieven. Ondertussen zien der weeral wa gezellige cluboavonden gepasseerd. In November en December was ter nen cursus videomontoage, die wer goe bezocht moar leverde uuteindelijk nie vee leden op. Die cursus was beste we intressant en der viel wee veel te leren oak voor degenen die al vee filmden. Degene die nie gewist zijn, jammer et is een gemiste kans. Doarna woare der nog vee clubaovonden mee uutleg. O.a. een met uutleg over opnoame mogelekheden. Woaronder doorfocussen en uitzoomen. Da was wee eel interessant. Moar een poar aovonden later komt “onzen Belg” mee wa iezerwerk oanzetten. Da moe nen “crane” voorstellen. Et was een ingewikkeld stuk uusvlijt, mee nen langen stok, zoda ge op uen “oger niveau“ kun filmen. As ge dus op een oger niveau wil goan filmen, dan moogde da goan gebruuken. K ben benieuwd wa we dan goan zien. Ondertussen zien ze oak van Scheldemondtv geweest. Ze willen groag filmkes voor hun uutzendingen. In de nieuwbrieven van John K is dan oak voak te lezen, da der weer filmkes van de leden vertoond worren. Da is toch wel leuttig om films van de clubleden op tv te zien. Dan ebben we oak nen mooien film gezien van Leen Muller over het Hospice. Iedereen was doar zeer van onder den indruk. Doarna waeren er films van et Nova festival. Maor oan de sfeer in de zaal te ooren en voelen was da ni zo'n succes. Eigenluk vin ik onze films mooier om noar te kieken. Da kom woarscijnlijk omdat vee dingen voo ons bekend terrein is. En zeg nou zelf, op et Zeeva regio festival woaren toch weer eel mooie films te bekieken. Jammer da der geen nominatie in zat, moar Sjaak eeft dan, mee zijn 73 punten, toch moar een mooie score neergezet. Door de jurering weet ge weer woar ge op moe letten, dus volgende keer kunne we waarschijnlijk weer kieken naar nog mooiere films. Dn ebben we nog nen uutleg gekregen oe of Sjaak zijn voorbereidingen moakt voor nen film en oe die zien beelden selecteert en opsloat. Ik dink da we doar oak wel wa van ebben geleerd. Der zien nog 2 aovonden te goan voor onze zomervakantie en dan zit et zeizoen der weeral op. Ik denk dak wel mag zeggen da we weer vee geleerd ebben. Allen een leuke vakantie, mee vee videomomenten, en we zien mekaar weer in et volgend video seizoen, met vee mooie films. Mee groet van OOY

Januari 2016 (00X) Goeiëndag 22
Goeiëndag. Allo ama, wak noe èn meegemaokt is an iin kant jammer, ma an den anderen kant oek wè wii iil leutig. Wa was ter loos? Ut bliekt da zowè 00Y as ikke un stukje adden ingestuurd, en da bliekt nie te kunnen. Koorden van dien ouwen……… oh nii da zouknie meer zeggun.  
Weetje wa ik za voortaan Cor zeggen want zo iitie toch, en das den enigen da à wiit wien an ik ben, wan toen was tie nog vòzitter en dun afspraak was dattie nie zou verklappen wien ank ben en da te stukjes via em zouen lopen, da outie gelukkig nog steeds vol wavo mien dank. 
Ma noe oorden ik van um da zowel 00Y as ikke een stukje adden ingestuurd en da konnie atien secrutarus gezeit, da wi zeggun tis leutegur a ter af en toe un stukje komt ennie ama in iin keer.
Dus iirluk is iirluk, wan 00Y was schienbaar eerdur dan ikke, dus wor ut stukje van 00Y eerst vurtoond, of oe noem je da.
Ma om iirluk te zien vin ik die stukjes van 00Y altied iil leutig en lees ze mee vee plezier en koopen da ta bie judder oek zo is. Ma, kregen wè de vraag om mien stukje een bitje an te passen en addut dan wa laoter zou ooren, ja oe noem je da, vertoond. Dus da benk noe mee bezig, ma dadeerste stuk kank vaself nie meer gebruuken, dus da gaak der uut aalun en het verdere kan dur dan wii achteran.
Ma beste mensen ik wensen judder natuuluk toch un iil goed 2016 (noe tikten ik toch iirst prongeluk 3016, maok ta mee) en koopen vaself da judder wii vee iile mooie films mogen maoken.
Je weten ut ee, kiek maris na onze Belgische vrienden Ingrid en Erik, die èn toch we wa gepresteerd zekers, die èn un film gedraaid gat op da grote festival, nou daa kom je volgens mien echt nie somaaroor.
Das trouwens dun twiiden kiir aloor dat ta bie ons in de club zo is, wan dien Leen è ta oek al is un keer gat mii zun film over Doel, da weet ik nog goe, wa was da un schoonen film, en oek ema zo echt, volgens mien zittut oek daarin. Dien Cor, wies ons dur zo vaok op, ait nie probeer kom je dur nie.
Kgaon der dus vannuut da judder dadoek ama gaon proberen, ben we bang datta bie proberen za bluuven, maa je weet ma nooit wan der ben der bie ons toch we een paor die antoek verre kunnen briengen en dur zitten dur volgens mien oek nog we een paor an te kommen, vroeger zeijen ze, die staon in de wacht. Nou ik zou zeggun bluuf nie in de wacht staon ma gater tegenan, zo ben anderen dur toch oek gekommen.
Ma kwil judder wè verklappun dank zelf oek a vee, mislukte, pogingen èn gedaan om films te maoken die ank op de clup kon laoten zien, ma die èn judder nie gezien, wan da durfde ik nie.
Kweet noe a zeker da ank dien Cor tegen kom ik gliek op mun kop krieg vannum, omdak mun mislukkingen, in mien ogen, nie èn laoten zien. Kweet eigenlik à wattie ga zeggun!!!
En om op da grote festival trug te kommen, da èn we bie ons oek al un keer gat oor, das wii a jaren trug, dus da sa in de toekomst wè weer un keer bie ons zien, net zo as in 2014 de festival mii die korte filmpjes.
Ank wank net èn geschreven zois na lees dienk ik waa aal je da ama vandaan, ma da moenk nie dienken, gewoon schrieven, nou ja tikken dan in di geval. Soms dienk ik wellus jà schriever moeten ooren, ma‘k dienk dat ta da voo noe a un bitje te laote is, daarom probeer ik judder ma een bitje te vermaoken mii deze stukjes, dan enk toch oek nog een bitje inbreng, wan van de rest moeten judder ut nie van mien èn oor.Kiek is an noe enk stiekum toch wii meer geschreven as anders, dus gaank dur dus mii stoppen mii de bekende woorden: Zoo da wast wee voor deze keer. Vee film plezier en tot de volgende keer. Van judder 00X

2015
December 2015 (00Y)
Beste OOX en videovrinden. We ebben der weeral 7 clupavonden op zitten en zjn iermee weeral oan et ende van et joar. 
We ebben weervee geleerd o.a. van Sjaak mee zun uutleg over pinnacle. Da was eel leerzoam. Der waoren vee vragen, dus den aovond liep een beetje uut. Moar da is in di geval elemaal goed.
De clubwetstriet wer deze keer op een nieuwe wijze gepresenteerd. Da was toch we proffecioneel. Moar oak de films die vertoond werden, woaren ook mooi om te zien. Ge kunt dan oak wel zien, da de clubleden vee ebben biegeleerd, want de films worren steeds beter.
As ge uutleg wil ebben over un nieuwe camera, dan moede bie Frans zien. Die had doar nen schoone uutleg van.
Dan ebben we nog nen clubfilm opgenomen. 3 stuks zelfs. Da was wel hillariteit, want et was echt improviseren. Moar we leutig. De camera mensen stonden op een kluutje bie mekoar, om het mooiste shot te moaken. K wist oak nie da ter zoveel toneel talent bie de club was, want ook die deden het eel goed. Ik ben doarom wel eel benieuwd oe de uuteindelijke films der uut goan zien. Moar doar moeten we op wachten tot 8 maart.
Ondertussen geeft John nog nen cursus hoe der gewerkt kan worren met Magix. Volgens oaren zeggen, zin de cursisten eel nieuwsgierig noar de werking van dit programma en ebben vee vroagen. Nu moar hopen, da der nog wa mensen zich bie de club oansluuten.
Ik geniet ook altied van de films die judden enn gemoakt en die besproken worren door Cor en de medeclubleden. Want ist judder opgevallen, da Cor de leden eerst benaderd voora tie zelf een uitspraak doet. Da is wel leuk, want dan moet ge toch beter opletten en goed noar de film kieken, om een goed oordeel te geven (volgens Cor zien da goede leermomenten).
Da was wee een beetje mien verhoal. Ik wens judder plezierige feestdaogen en hopelijk kunnen we volgend joar wee vee mooie films bekieken. Mee groet van OOY

Oktober 2015 (00X) Goeiëndag 21
Goeiëndag. Allo ama da benk wii, de vorige kiir schreef ik: Der zullen der zeker wè wii mee een iileboel films kommen wan noe èt iedereen toch wè genoeg tied gat om te filmen en der wa van te maken. Ma ank iirluk moe zien viel me da toch wè een bitje tegen, den iirsten clupavond kon ik nie, da kom trouwens nie vee vooroor, ma ken gooren datut toen nie echt druk was, ank da een bitje fatsoenluk zeggen. Misschien is 8 september toch nog een bitje an de vroege kant voo de miisten, vo mien was da nies so oor, ma kan iets waarank so ma nie onderuut kon, da kaij welis èn ee.
Ma den tweeden avond wast wii a un stuk beter, maar iil anders as datut op het programma ston, ‘k dienken dat dien William zun “loader” vergeten was, anders kan da toch nie? Ma da emme nog tegoed!!
De leste keer adden we 2 dames op bezoek van omroep Zeeland, da was echt leutug en oek goed, tumiste da von ik. Ken da intervjoewen altied un moeiluk gebeuren gevonnen, maa die dames wisten da toch ma even goed te briengen, duudeluk en begruupeluk, en ai vraogen a kreeg je oek un duudeluk antwoord. Om iirluk te zien enk gin vragen gesteld wan zo ank al zei das voo mien nog steeds un moeiluk onderwerp, ma de vraogen die an ze wè kregun wieren oek zondur problemen beantwoord. En da waren best nog wè jonge dames oor, maa ze stonnen nie soma mee udder mond vol tanden, ze wisten echt wa zut over adden, iin van de dames was al is eerder bie ons gewist, da weet ik nog wè, ma kweten nie mii wa da over ging, misschien wè tselfde??
Ma oe ait oek draait of keert (oe zei ik da) ut bluuft elke keer wii interussant op de clup, dur val aaltied wa te leren. Dus van mien ben ze nog nie somaraf, ken ut nog steeds vee na mun zin, dus zouk zeggen deurgaon zo, ma vanself wè mee zun allen, we moeten nie allus alliin an die mensen van ut bestuur overlaoten, wudder mogen oek best wellis wa meer onze anden uut onze mauwen steekun, ik probeer dadoek welus onopvallend te doen, ma da ta echt lukt kank nie zeggen.
Mun partner (kga vaself nie zeggen of da ta un jongen of een meisje is, wan dan wetun judder gliek oek of ik un jongen of een meisje ben en das nie de bedoeling) zeg altied ank wee tuus kom, kzien an je dait wee na je zin è gat, dus da val wel op. Zoo da wast wee voor deze keer. Vee film plezier en tot de volgende keer. Van judder 00X

September 2015 (00Y)
Beste 00X en videovrinden. Ebben jullie den nieuwsbrief van september al gezien? Der gaot weer vee gebeuren di seizoen. ‘k denk da der voor ieder we wa bie zit en moeten we ons di seizoen nie te gaon vervelen. ‘k vin dat die evenementecommisie weer goe z’n best e gedaon. Want et valt nie altied mee om een goe programma te maoken.
Moar even en andere vroag, ebben jullie veel gefilmd deze zomer? Der was overal wel wa te doen. Moar ‘k ben nie veel “gele” clubhesjes tegengekoamen. ‘k heb der zelf wel mee oangeloopen, maor geen nieuwe leden kunnen werven. Maar misschien komen ze wel kieken, als John aan z'n Magix cursus goat beginnen.
‘k ben wel benieuwd noar wa jullie afgelopen zomer ebben gefilmd en gemonteerd, zoda we weer een boel te bespreken ebben. ‘k oop soamen mee jullie op een goe en leerzaom seizoen. Tot op de club aovond op 8 september. 
Mee groet van OOY

​Augustus 2015 (00X) Goeiëndag 20
Goeiëndag. Allo ama da benk wii oor na de vakansie, kopen da judder het oek ama een bitje leuk èn gat, ik wè oor, ma da lig vaself oek we an jeneigen. Der zullen der zeker wè wii mee een iileboel films kommen wan noe èt iedereen toch wè genoeg tied gat om te filmen en der wa van te maken. K’ben wè benieuwd oor wan der ben echt wè goeie filmers in onze club trouwens ank iirluk moe zien vin ik dadover talgemiin de kwaliteit en ut nivo van de films bie ons op de clup echt behoorluk ant beteren is.
En mensen, ik zit à een poosje op de club dus enk à iil wa films gezien, en oewel ikself, iirluk is iirluk, nie zon goeie filmer ben, zienk tog wè wà te anderen der van moaken en dà kank echt van genieten, en à ta nie so was, zat ik misschien nie mii op de clup, mà noe enk ut nog iil vee na me zin en dast belangriekst vin ik, mà kmoe ter natuurluk we biezeggen dat ta inderdaad komt om da judder mee iile schòne film kommen.
Vaself mag iederiin mee films kommen die attie self leutig of mooi vin, ma af en toe zienk wèlis un film waa van ik dienk oe krieg jut vomekaa om zoiets te maoken, ma die maker et tur gin moeite mee om ons da voo te schotelen. Ma “gelukkig” respecteren de miisten ut doorut netjes uut te kieken, ma ank zo is rond kieken en ooren wor ter tog nog à verschillund over gedocht. Mà iirluk is iirluk ik waardeer ut toch da te leden oek die films respecteren, da wi nie zeggen da se tur mee iins zien, ma da bewies wè da iederiin op de club mee zun “producties”op de proppen kan kommen, en ik dienk da ta oek so oor. Vee film plezier en tot de volgende keer. Van judder 00X

Mei 2015 (00X) Goeiëndag 19
Goeiëndag. Allo ama da benk wii. Mensen maok ta mee, ik ben in ieder geval iima onder dun indruk.
Ken ut noe over die wedstrijd die a ter ieder jaar is, ank ut goed begrepen en adden we, samen mee dien andere vidioclup van den overkant, wè 17 film bie mekaere. Ga ta maris anstaon om die te “beoordiilen” zo as ze da noemen.
Ma waaran ik zo van onder dun indruk was da ter 3 nomminasies (ja zo iit ta) waren, volgens mien adden we da nog nooit gat, iin bie dien andere clup en 2 bie ons. Ma om iirluk te zien von ik a da tie 2 leden iile mooie films maokten, dus da moest un kiir raak zien vaself, ma 2 tegeliek das ter nogal op é, ma vo zover ik da kan beoordiilen wè op zun plekke oor.
En wa dien “ouwe” vozitter oek vertelde, ut nivo van de films wor oek ieder jaor beter ai da vergeliek mee iil Nederland, das toch mooi. Noe za tien “ouwe” vozitter me da we wee nie in dank afnemen wan da et tie allis tegen me gezeid, dank um altied dien “ouwen vozitter” noem, ma ik zeg ut ier oek nog maris un keer, net zo ank da oek a tegen um zelf gezeid èn, ik zeg da mee respect, zo noe staat ut op papier, at tie ut noe nog nie glôf dan kank ut oek nie elpen.
Ja mensen tis a mei, da wi zeggen datut wee biena klaor is mee de clup, ma we gaon mee un pa maonden wii op zun gemakje verder oor, en dan en me wii iil vee film vaself, zo na de vakansie.
Mien ervaring is altied bie de clup dat ter na de vakansie altied iil vee films zien, dus da wil zeggen dattur in die vakansie tied bliekbaar vee meer gefilmd oor. Noe laot ik da ma staon, ma ik bedienk me net dat ta eme nie waor oef te zien, van da vee meer filmen, ik dienk eerde dat ta kom van die maonden datut giin clup is vanself. Oe dom wa da ma.
En ik zeg ut nog maoris, ik vin dat ut iil goed gao op de clup, ik zit ter al een poosje, dus kan ik daa best wè un bitje over oordiilen. Ai dan is oor oe da ta bie sommigge clups ga, maggen wudder zeker nie klaogen.
En wa mien oek opval is da te miisten zo as bliekt best we mee willen werken a ta nodig is, en das noe precies waaron ut volges mien oek zo goed gaot.
Noe zit ik zonder erg al an een iil velletje, ma kgaon dur vaself giin stukje uut aalen, da zou te zot zien.
Koopen da judder wii un bitje van mun goeiëndag èn genoten.
We zullen mekaor misschien nog wè zien op de clup, ma judder weten toch nie wie ank bèn, en laoten we da ma zo laoten, das toch vee leutiger. Dank kank temindt gewoon schrieven wank wil zonder dat ter iemand lilluk na me kiekt, ma kmoe wè zeggen ank is een grapje maok over iets of iemand, ut is altied goed bedoeld, en koopen da judder da doek zo zien.
Kwensen jullie ama een fijne vakansie tied en mooie onderwerpen om te filmen en koopen judder na de vakansie wii ama gezond tegen te kommen. Vee film plezier en tot de volgende keer. Van judder 00X

April 2015 (00X) Goeiëndag 18
Goeiëndag. Allo ama da benk wii. Mènsen wadisda wiira un tied geleeën dank un stukje èn geschreven, dus nou moenk dur toch wè wii even tegenan, ma ken tiin en ander oor. In deerste plaots moenk voo mien ut belangriekste evun kwiet, en dadis dank in alle eerlukeit moe zeggun dadut op de club iil goed gaot. Das vaself wè mien mening, ma ank zo is rondkieken op de clubavonden zien dur iil vee die ant best naorudder zin èn, en das toch goed. En dan dun opkomst zo atta iit, die is oek iil goed in mien ogen. Wa mien oek opvalt is dattur druppelsgewies toch wii nieuwe leden binnen kommen of enk da mis? En weetje wa, op de vorige clubavond keek ik men ogen uut, wan daor ai un wetouwer van Terneuzen, die ken ik toevallig, alliin ma van zie oor, ma kwist wien at was en die kwam op onze clubavond, maak ta mee, en die was noga positief oek., iirst docht ik nog zou die oek lid oren? Der was oek nog een vrouwmens bie um, die ank van gezicht we kenun, maar ken der naom gemist, ma die wist duudeluk oek wè wa filmen is. Da ben toch leuke dingen voorun club a zon wetouwer is langskomt, ut oe en waarom is me nie ema dudeluk gooren, ma da za nog we kommen dienk ik, zou tie dan toch lid oren? Ken ut tuus gliek verteld wan da ben dingen die ai nie dageluks meemaokt ma da maokten ut eerluk gezegd nie vee indruk!! Dien nieuwun voozitter, dus den diejun die a na John is gekommen kom oek in zun doen, da moei oek even an wènen oor om zon club te leijen, ma da ga met te keer beter, volgens mien è tie zoiet al is eerder gedaan dan kannie anders. Dien voozitter di a so lang voozitter is gewist en an wien ik altied men stukjes stuur, zo as afgesproken, zei een poosje geleejen a tegen me dank even moest afwachten wan dat tie dur zelf iil vee vertrouwen in a dat ta nieuwe bestuur het iil goed ga doen. Ei zij af en toe moetadis wisselen, dan krieg je andere ideejen en dadis alliin ma goed voo de club en die zat we weten want die et tut toch een iile tied gedaan. Zo mènsen da wast wii voo deze keer. Tot orens, en eh, judder mogen van mien nog steeds reageren op mun stukjes oor. Vee film plezier en tot de volgende keer. Van judder 00X

April 2015 (00Y)
Beste OOX en videovrinden. Et seizoen zit ter al biena weer op. We ebben nog 4 cluboavonden en dan is’t alweer gedaon. Maor we ebben dit seizoen toch weer vee geleerd. Afgeloopen dinsdag et Cor verteld da der 17 films waoren ingeleverd voor de Zeeva wedstrijd. Et leukste d’ervan was da’t ie vertelde da der 3 genomineerd zien. Dus da betekend da die meer dan 78 punten ebben gehoald. As ge dan ook oord da het gemiddelde van Nederland 65 punten is, en da der van de Zeeva 14 boven dit landelijk gemiddelde zitten, dan is da voo ons clupje nie slecht dus. K wil er maor mee zeggen dan we weer vee geleerd ebben.
28 april ooren we wie zen film gewonnen eeft. K ben der eel benieuwd naor. Maor ondertussen worren der veel mooie films gemaokt die de leden op de clubaovond loaten zien, Zo at George wee een eel mooi filmke over kerken en een koor. Voo degenen die der nie waren, jammer, want et zat goed in mekaar. En we ebben daor ook weer van kunnen leren. Cor a nen film, mee wel eel veel waoter, k was bliee da k nie in da bootje zat.
De filmanaliese van Cor, was ook weer een verrassing, mooie beelden, maar ge moe wel goe kunnen ontouen en da is op onze leeftied wel eens moejlijk. Maor loat ons van de zomer, maor weer mooie opmoames maoken, mee of zonder hesje, zoda we volgend seizoen wee veel te zien en te leren ebben. Voo de genen die der nie waeren afgeloopen dinsdag. We kriegen van de club een hesje mee den naom van de club, as we da draogen bie et filmen levert da misschien nog nieuwe leden op. Da zou we leuk zien. Tot den volgenden clubavond. Mee groet OOY

Januari 2015 (00X) Goeiëndag 17
Goeiëndag. Allo ama da benk wii. Natuuluk voo judder ame de beste wensun voor ut nieuwe jaor, en daj ama iile mooie films mag maoken. Kèn voo men eigen vanself oek wii a goeie voornemens, mao ?? afwachten.
Zo af en toe kom ik dien ouwen, sorry ik bedoelen dien vorige voozitter tegen en dan maoken we van de gelegenteit gebruuk om even een praotje te maoken. Of tie da na da tie dit leest nog we wil doen is natuuluk even de vraog, wan ik laat OUWEN staan, nie om dank um een ouwen vin, ma omda ta ier bie ons “vorigen” mee wor bedoeld, dus da moe tie ma voo lief nemen. Kwas wè een bitje vebluft over wank van um oorde. Wan in ons praotje kwam toen oek na vooren dattut nie zo goed ging mee de Zeeva, en da zattie nog a mee, ij zei dat as ta nie bluuf bestaon, we wè aongesloten moeten worren bie Brabant omda we anders giin films mii kunnen draajen deur, ik gloof dat ie zei, de muziek. Ma ik kant mis èn, wan ik kont nie ama presies volgen wat tie amma zei. Ma ank iirluk moe zien enk da toch af en toe is an gedocht en dan docht ik, a ta ma nie waor is wan oe ei dan kontakt mii die ander clubs in Brabant?. Kmoe der nie an dienken da mun clubje dan misschien wè om zeep ga, aliin a de gedachte dank nie mii gezellig na DE CLUB zou kunnen gaon kank a wakker van liggen, dus duum ik af en toe dat wè mee za gaon vallen.
Tis deze keer un bitje somber Goeiëndagje, wan de clubwedstrijd was noe oek nie wai der normaal altied van mocht verwachten, kweet nie oe da de deelnemers dat èn ervaren, wan ik a giin film, ma twas nie so as andere jaren, maaa we moeten vanself wè open staon voo veranderingen.
Overigens gatut, in mien ogen dan, best wè iil goed mee de club, der is altied wa te leren, der kommen vee leden mee films en in vin dat de kwaliteit oek steeds beter oor en da iil goed.
En wank oek belangriek vin, je merk dat te leden oek mondiger ooren, vergeleken mee jaoren terug, toen waren ut biena ama luusteraars en kiekers, ma tegenwoordig doen ze vee meer mee. En ik ent ama meegemaokt, dus ik weet wa ank ut over èn. En wat oek zo leutig is, ai un film laot zien dan wor tie besproken so a ta eet, en da wor je nie afgekraakt of zoo, ma je krieg we eerluk toren wa ai zou kunnen verbeteren, en joor ut oek at goed is.
Zo da wast wii voo deze keer. Tot orens. Vee film plezier en tot de volgende keer. Van judder 00X

2014
November 2014 (00X) Goeiëndag 16
Goeiëndag. Dank der un konkerent bie a wist ik, en da vonk nog leutig oek wan da prikkelt mien om self oek wii bezig te zien. Noe was ik a van plan om weeris een stukje te schrieven, ma noe was 00Y, wie da ta oek mag zien, me toch we voo zeker, wan ik èn een bericht gat en da ston ta stukje in, dus noe moenk wè. Ma da vink elema nie erg oor, wan ik respecteer altied iedereen dus zekers oek 00Y. Ma ik was wè vee eerder bezig, dus innalen za 00Y me nie, wan ik ben van plan om minstus 100 tooren en da duur nog iil lang. Ma kiek, waa ank ut ema mee 00Y iins ben is da we wii un flink programma en bie de club, a ta wii klaar is, tegen den elft van volgend jaar, dan en we, a) vee gedaan en b) vee geleerd, das voo mien we zekers.
Da wi natuuluk wè zeggen ai der oek echt mee mee doe, anders ij der vanself nie vee an, maa kgaan der van uut da we der wee ama tegen an gaon en da we wii iil vee moois te zien en tooren kriegen.
Dun volgenden clubavond èn me de clubwedstrijd, van mien moeten je op nie vee rekenen oor, ma ken we verwachtingen, wan der ben echt we goeie bie oor op de club, ma kgaan gin namen noemen.
De leste clubavond adden we wii een gast die a fotografeerden en filmden mee zo’n droon, en ank et goed begreep wou tie oek lid worren van de club, nou ik zou zeggen, van mien avast welkom.
We adden al een lid die a mee un droon werkte en dus noe nog iin.
Wa ga ta na toe, strakjes moei ama zon ding èn om der bie tooren, ma ik dienk wè da ta mee sa vallen.
Mensen en judder da programma voo di clubjaar al is goed bekeken? Nou ai da gedaan è, dan zuj we gezien èn da ter wii vee op stapel sta, dus maak je borst ma nat wan der val wii vee te leren, een ank iirluk moe sien, da voo benk ondermeer lid van de club gooren, wan ai tama alliin moe doen dan ka jet wè vergeten, tenminste da dis voo mien zo.
En weetje wa, naast de clubavonden en ze oek nog apparte avonden voo leden die an mee utselfde programma werken, nou ai ut tan nie leer, dan leer je ut volgens mien nooit meer, dus je weten wai te doen sta.
Zo mien velletje is wii vol, dus je weten ut ta zeker, dan gaank der mee stoppen.
Vee film plezier en tot de volgende keer. Van judder 00X

Oktober 2014 (00Y)
Beste 00X en videovrinden
00X was me net voo mee et ploatsen van een berigt. Dus eb ik even gewacht om te reageren.
Het videosezoen is begonnen. Nou we zullen het weten oak. Et is een eel groot programma geworren. En der wor nog eel wa van ons gevraogd. We ebben al het monteren op een ipad gezien. Nooit geweten da di zo mooi kon. 
Dinsdag was Reno Maenhout der, en gaf uitleg over z’n fotograferen mee n’en vlieger en n’en drone. Eeel mooi, moar ik ga men opnames toch maor maken van af beneden naor boven en ni van boven naar beneden.
En da komt goe uit, want we hebben een opdrachtfilm om het “weer in zeeuws vlaonderen“ te filmen. Dan denk’k oan mooie luchten filmen, want die ebben we veel in ons zeeuwse landje. Et is ier altied schoan weer, dus wa moeten we daor van gaon maoken.
Ge mag die'n film alleen moaken, maor ok soamen met iemand. K ben benieuwd wa ieder daor van goa maoken.
Ik heb al zo'n beetje een idee, moar dan moe et “weer” meezitten natuurlek.
Der is natuurlek weer nen clubwedstrijd, ik oop da jullie daor een filmke voor ebben, want vorig jaor is die nie doargegoan omdat er gen filmpkes waoren. Da was toch wel jammer. Moar noar ik vernomen heb zijn der al 5 filmpkes, en ik hoop da der nog wa biekomen. Want de voorziter zei wel da er drie priezen woaren, maar het zien der vier. Want der is oak een pries voor den meest creatieve filmer. Dus loat er nog wa filpkes biekomen, anders eeft er 1 persooon geen pries, en da is sneu. Bij meerdere filmpkes die nie in de priezen vallen is het dan gedeelde smart.
Verder komen der diverse onderwerpen aan bod, dus er valt weer vee te leren. Moar da ebben judder al wel gezien in het overzicht. Op et eind van het seizoen ziin we allemoal weer een stuksken wijzer geworren. Ik goa judder zien op de klupaovond van 11 november mee eel veel filmpkes. Met groet OOY

Augustus 2014 (00X) Goeiëndag 15
Goeiëndag. Mènse mènse, je kunnen ut gloaven of nie, ma voo mien wor ut tiet dattu videoclub wii ga beginnen. Oe is da mogeluk, dadenk nog nooit gat, dank de club gao missen ast vakansie tiet is. Da dè me ant dienken gezet, da moet toch een reden èn, en da kan volgens mien nie anders zien dan dakket op de clubavonden vee na me zin èn, en koopen dat da nog lang zo bluuft, das un goeteken voor de sfeer en alles op de club, en dadis oek wè an judder ama te danken, dis nie alliin ut bestuur, ma ama wan ut is toch wè iil belangriek oe aij mee mekaar omga toch.
Mekare elpen deën w’altiet wèloor, ma tis net of da ta geintensiveerd is (oe enk da gezeid) ma tis wè wa, en dat geef ta gevoel dienk ik. Aij zie oe da iederiin mee mekaore omga dan kant nie anders dan dat goet ga. En toch weet ik nog nie precies wat da ta sfeertje noe eigenluk is, da kank mun vinger nie achter kriegen, en das a jaoren zo oor, ma laoten we blieë zien dat ut ter is en dur ama an meewerken da ta bluuft.
Kben wiira iil benieuwd na de films di amme straks wii te zien kriegen, wan ik gaon der van uut dadiederiin wii volop gefilmd è. Zefs ik al zullen judder da nie willen gloaven, toch is twa, maaaaa, da wil nog nie zeggen dank direkt a mee un film za kommen, dus un bitje geduld mee me.
Oek benk vanself iil benieuwd wa ter noe wii op ut programma za staon voo di clubjaor, doar èn me nog niks over gooren, ma da dooren we vast nog wè, miistal is da nog vo dat ut wii begint, dus da kan nog we un pao weekjes duren..
Das raor è nu was ik wii begonnen an mun stukje omdank er zin in a en ut begon oek makkeluk, ma noe enk ineens giin isperase mii, oe moe ta noe.
Ik weetut, ik stoppen gewoon en gao morgen wii verder, wie weet is ter dan wii insperase. (tot morgen).
Jao mènsen nu ist morgen en kèn nog gin insperase, dus dur zit niks anders op as dank der mee stoppen voo deze keer.
Maaaaaaa, kben dur zeker van dank over un poosje, a te club wii draait wii genoeg insperase zal èn om een volgend stukje te schrieven, dus da gaokt ma op auwen. Dus, tot de volgende keer. Van judder 00X

Mei 2014 (00X) Goeiëndag 14
Goeiëndag. Allo ama da benk wii, ken wè tiin en tander, ma ofta genoeg is vô een iil blaodje das nog de vraog, ma da zien we vazelf wè. Jao je kunnen ut glôven of nie, ma tis nog iin keer klupavond en dan ist wii a vakansie tiet. Schrik noe nie van da leste woord wan zo zeggen wudder dad ier. Dan kom wii de tiet, kiek da eit wii, da we wii volop gaon filmen, teminste zo gao ta bie mien, ma ank da zo is op de klupavonden an kiek filmen judder ama tiile jaor deur, en eigenluk moetadoek natuurluk, dus pasop kèn men eigen voorgenomen om daor di jaor oek is echt wadan te gaon doen. Dus an judder straks in het najaor overdonderd worren mee ama films van dezelfden, dan moei misschien maoris dienken, zou da misschien 00X zien? Ma ait vraogen zank da in alle toonaorden ontkennen, der ister ma iin die a weet wie ankn ben en die è me belooft da nie te verklappen. Ma ank zo is terug kieken op di klupjaor, dan èn we nog awa meegemaokt oor. Wèn volgens mien zeker wè 3 specialisten in uus gat zo atta iit, jonge jonge, da waoren wè zwaore jonges zeg, en die wiste ama wè wa ze tover adden. Das toch leutig da zon klupje antuuteinde van tland dat ama ma voomekaore krieg, ken vee bewondering voo da bestuur, die regelen da ma ama voorons. En weetje wadoek zo belangriek is, je leerter nog ontiegluk vee van oek, da wil zeggen da vin ik, ma misschiem ben der bie judder wè die da ama a wisten, ma iirlek gezeid gloof ik da gin snars van.
En dan en WE nogal an de weg getimmerd, WE en ier bie ons da festival gat mee die films di an ma iin minuut duren. We, moei mien oren, ken der eerluk gezeid gin vinger vooruut gestoken, en achteraf schaom ik me da we een bitje voo, want twas toch onze club die atta dee. Ken om eerluk te zien toch wè vee bewondering voor die mensen die an da wè ama èn geregeld, wan der kan der noe tog gin iin mee zeggen van de filmers in Nederland dat tie nie weet waarradonze videoklup zit. En nog zoiets leutigs, ai meedoe mee die jurering bie de zeeva die a ter ieder jaor is, en der is giin nomminasie bie, dan ga te film die a toogste is geworren toch deur, en die woroek gedraaid op da grôte landeleke festival da da ieder jaor ergens wor gouwen. En di jaor is da ter iin van ONZE klup. Ja, tga goed bie ons, mao volgens mien kom ta omda biena iederiin mee wil doen a ter iets is en das noe is echt leutig. Ken dien vorige vozitter wel is oren zeggen, nie geschoten is altied mis, en ik glôf da taar un grôte waarijt in zit. Zo mensen men penne is leeg, o nii da kan nie, wan ik zit di op de compjoeter te tikken, ma toch stop ik wan men kop is leeg, en das we wa. Tot de volgende keer. Van judder 00X

April 2014 (00Y)
Beste 00X en videovrinden. Ik weet nie of kudder alle kranten lezen, die in de busse kommen, maar et kan jullie nie ontghoan zien, dater nogal wa recloame gemoakt word voor et 1 minuut festival in Axel. Ik dienk dus da ta wel goe goa kommen. Oak z’n der sponsors bie gekome. Da is alleen moar leuk. Nou ben ‘k wel eel benieuwd oeveel films er dan uuteindelijk, vertoond goan worren. Ebben jullie al wa ingeleverd? Want ge kun nie zeggen da ge et nie geweten heb, na al die recloame in de kranten. Eigenluk oop ik dad’er na al die recloame voor het filmen, er ook nieuw leden bie komen. Moar dad is afwachten. Voorloopig is het bestuur er druk mee. En dan ebben we natuurlijk oak nog het Zeeva filmfestival op 22 april. K’eb gezien dad er 13 films zien oangemeld, woar van 3 van George. As die dan nie in de priezen valt, dan weet ik et nie meer. Affijn we zullen het dinsdag wel zien. “De rijdende grensrechter” is afgeloopen weekend vertoond en was oak een succes. Zeg maar dad er gen talenten zien in onze club. Door al die presentaties op de club door o.a Jef Caelen en Piet van Eerden, en nog een presentatie tegoed van Leo Baeten, moet et ons toch lukken om nog mooiere films te moaken. Tot ziens op de volgende klup aovond.
Met groet 00Y

Maart 2014 (00X) Goeiëndag 13
Goeiëndag. Allo ama, schrik nie van nummer 13, wan ai da wè doe bijj biegelovig en das iilemaal nie nodig en in mien ogen oek in bitje dom (da enk gloof ik al is meer ooren zeggen deur un schôôn vrouwtje, misschien kenne judder die oek wel ergens van?). Ma noe kom ut, ken der un konkurent bie gekregun, ma inplaots van da ta me zeer doe moenk zeggen dank davo in de plekke juust vee leute èn, wan da prikkult un mens om nog beter zun best te doen, das net as mee onze films wa of nie?, wudder worden toch oek geprikkeld om ut beter te gaon doen an we de films van onze mede leden zien.
Noe realizeer ik me wè da we de zaoken een bitje moeten gaon verdiilen, wan onze site is nutuluk giin dialekt biblioteek, dus gaonk wè deur mee mun stukjes, ma un bitje minder vaok, da wi zeggen ai judder ut dao mee iins zien, anders oor ik da wè en passun we da gewoon weerran.
Maaaaaaaaaaaa, kopen natuuluk wè da 00Y oek deur bluuf gaon, dus 00Y je weetut ga je gang wan ik kiek tur a wee naaruut waarai de volgende keer wee mee op de proppen kom, zo lang at ma leutig is.
Mien stukjes gaon via de vorige vooztter zo as afgesprôk’n, ma oe kommen joen stukjes op de site, daor enk ma raijen na, dus eigenluk weet ik nie eens of je un vent of een wuuf ben, nie dat ta uut maokt, ma tis eigenluk nieuwsgierigeit. 
Op de leste vergadering è tie voozitter zun amer neer geleid en voor een tiedje over gegeven an dien John, die a altied de PR dee, das zo ak ut begreep voo iin jaor wan dan zou dien William ut gaon doen. Eèèn oek de secretaris Leen èt ut stokje overgedraogen an dien anderen John, weet je wè die van dun sait.
Ank iirluk moe zien moe me toch wè blieë zien dat tur toch nog steeds mensen zien die an da voo ons willen doen.
Ik zeg voor ons, wan zo is ut toch, zonder mensen die ta willen doen zouwen we nie verre kommen dienk ik, wan ken begrepen das ze nie iins een secrutaris voo die zeeva kunnen kriegen, ken dur te weing verstand van om te weeten of da voo ons problemen gao gev’n, ma da ooren we wè at zo verre is.
Over un poosje èn mu da festval wa ai films voo moe maoken van iin minuut, oe moei da voo mekaor kriegen, ken me a suf gedocht oek da zou kunne doen, maa tot noe toe nog niks kunnen bedienken, ma kgeven ut nog nie op, wa ank wè an moe toevoegen da ta giin geransie is voo sukses.
Eigenluk ist nie waa wank zeg, wan ik à wè ideejun vó zon film, ma ik weet nie oe ank da in dien iinen minuut moe zien te proppen, wan tmoe wè te begruupen zien nutuuluk, dus das nog un probleem, ma da zank toch zelluf op moetn lossen, oewel ik daar un zwaor oofd in è.
Ma noe wee even trug na de club, wan naast de clubavonden èn we oek nog die twee avonden gat over die programmaas wa ai de films mee kan monteren, ken gezien da 00Y ut da oek al over a, ma oei toek draaid of keert da was toch wè iil interessant enk ooren zeggen, dus noe baal ik wè un bitje wan ik ben dur nie bie gewist, oe stom was da ma, dan krieg je de gelegentijt en dan vergeet je da na toe te gaon, alliin ma omda te clubavonden op mun kalender staan en die andere ank vergeten op te schrieven, da enk noe echt spiet van das echt wa. Ma ken ut iima amezelf te danken verdorie.
De leste clubavond was dien filmer uut Limburg bie ons, Sjef iit tie, menselieve die kan tur wa van, wie van ons gaotut um da nadoen, al zouk we willen dank da kon, ma judder oek wè zekers. Jeetje ‘k ben dur nog steeds van onder de indruk, ai da ma kan, en tleutige is die doe vee mee zun vrouw, sorry ma ik bedoelen natuurluk filmen, anders gao judder raar van me dienken ma das nie nodig, kattut echt goed bedoeld, die voelen makaor waarschijnluk goed an of ut kan oek da ze dur zo vee samen over praoten dat we goed moe kommen. Zo mensun kga dur weerus un punt achter zettun anders enk ut idee dank un boek ant schrieven ben. Tot de volgende keer. Van judder 00X

Februari 2014 (00Y)
Beste 00X en videovrinden. Ik heb da stuksken in goeiendag weer gelezen en moe daor toch even op reageren. Daor is in de club natturlek weer vee gebeurt. Allereerst ebben we een nieuw bestuur. Dus da is wee gelukt. Ik zelf zou di nie kunnen, want daor komt toch eel wa voor kieken. Ge moe toch veel weten, om een goe antwoord te geven op de vele vraogen, die vanuut de club gesteld worden. En dan nie te spreken over al die dingen waor we geen weet van ebben, die achter de schermen gebuuren, maor waor we wel ons voordeel mee aolen. Maor William gaot da wel kunnen, ij e nog even den tied om zijnen rol te gaon vervullen, want John gaot nog even een tietje de voorzitter spelen. Den andere John et ter nog een job biegekregen. Ij maokte natuurlijk al de website, maar gaot er ook het secretariaat bie doen. Da is een hele kluif. Voor volgend jaor moet ter ook nog nen nieuwe penningmeester gevonden worden. Affijn we weten da op tiet, dus kunnen daor over nadienken.
K weet nie of het judder opgevallen is, maor der is nogalwa veranderd in de agenda van 2014. Dus ge moe toch regelmoatig naar de site gaon kieken. D’er vervalt nen oavend, maor daor komen oak weer andere activiteiten bie.
Den eersten uutleg over een videoprogramma ebben we al gehad. Het ging over Magix. Diverse clubleden hadden den laptop mee om den uutleg van John, mee te kunne kieken op hun scherm. Awel john gaf nen elen goeien uutleg. Het is echt een magik programma. 
Nu moeten we natuurlek oak nog de Pinnacle avond kriegen, eens kieken of da oak "magik” is.
Binnekort goan we naar de AVS studio’s kieken. Da liekt me wel eel erg mooi om te zien. Misschien goan ze ons daor wel overoalen om nen mooien film te maoken. Maor zoals die man van AVS zei, et moe wel kort en krachtig zien. En da is bie velen toch een probleem. We willen allmaol zo veel mogelijk mooie beelden laoten zien. Maor dan moe je maor dinken aan onze vorige voorzitter. Die zei altied: “Kill your Darlings”. Moar da is eel moeilijk 
John vertelt ons wel hoe we nen mooien vakantie film moeten maoken. Doar zullen dan ook wel “darlings” in gekild moeten worren. Oeps, op de agenda stond selectie vakantiefilm, maor da was nie om mooie beelden te selecteren, welke je wel of nie kon gebruuken, maor om te selecteren om overzicht in je bestanden te ouwen en op je tiedliene te kriegen. Die vergissing van ons was nie erg oor, want der kwam toch een goeie discussie op gang
Oe staot et met da 1 minuut filmpje? Omdat deze films in Axel gedraid gaon worden, moeten we natuurlek wel goe voor den dag komen, mee mooie filmpjes. K eb nog geen seconde film, maor ben der al uren mee bezig. Nu moet et nog uutgevoerd gaon worden. Maor da komt we goed. Opelijk bie jullie oak. Tot de volgende clubaovond. Met groet 00Y

Januari 2014 (00X) Goeiëndag 12
Goeiëndag. Allo ama, om te beginnen ama natuurluk een gelukkig en voospoedig nieuwjaor en vanself oop ik da we wii vee mooie films te zien kriegen. Eerst wil ik judder even wa zeggen, ik èn zon nieuw office programma gekocht, dus docht ik noe za ta wè vee makkelukker gaon om zon stukje te schrieven, ma das eema nie waa, das gewoon tselfde as da voo, je moetut nog steeds ama zelf verzinnen waijop wil schrieven, dus wa ta betreft benk dur nie op vooruut gegaon, ma nie getreurd, kgaon gewoon deur. Di stukje kank pas deursturen à te jaorvergadering gewist is, wan een poosje geleejen kwam ik de voozitter tegen en die zei tegen me da tie ging stoppen as voozitter, ma dank der nog even niks over moest zeggen tot ta de uutnodiging voo de vergadering is rondgestuurd, ma ij zei ut omda wudder een afspraak adden gemaakt dat mien stukjes via em zouen gaon en da mien identiteit nie bekend zou ooren, om te zurgen dak gewoon recht voo zun raap zou kennen schrieven zonder dat iemand na mien zou wiezen , en da tie da dus ta nie mee zo zou kunnen doen.
Da was ik ut nie mee iins, dus enk gevrogen of da mien stukjes toch via em zouen kunnen bluven loopen, wan dank er anders mee zou stoppen. ij èmmu beloofd da tie da an de beoogde nieuwe voozitter zo vraogen.
Intussen is geblek’n da ta ama in orde is gekommen, dus kan ik gewoon deur gaon mee mun stukjes en da vink wè leuk, wan ik begon dur vee aardiggeit in te kriegen, dus mensen zet je ma schrap wan dur kom best nog waddan in de toekomst, ik verkneuter men eigen dur noe al op, da ga nog wa oren.
K’moen toegeven da mien biedraogen aan de films in de klup op un laog pitje staon, ma op deze manier doenk toch oek wa voo de klup en zo af en toe zank oek wellus een film laoten zien, judder weten dan vanself wè van wie die is, ma gelukkug nie da tie van 00X is, wan da za ter nie op staon zo ai za begruupen.
Noe enk a un iil vuraal geschreven en eigenluk nog niks gezeid van wank anders altied doe, dus 00X pak juneigen bie mekaer en begin is te schrieven over die dingen wa ai tanders oek altied over è, ai ma nie ga herhalun.
Allee vooruut da ga tie, kopen dat tlukt en da judder dur wii van genieten.
Dur gaon avonden kommen over montage programma’s, voor zover ik da begrup drieju, iin over Pinnacle, iin over Aple (nii giin peren) en iin over Magix, en om da dik dur vanuut ga dai da wel tiin en tander van za kunne leren gaak ma na alle drieju dienk ik, ak dan nog is een nieuw programma wil kopen, wor ut misschien we een ander as ak noe èn, je weet ma nooit.
’T kom ama wè op tselfde neer natuuluk, wan je steekt tur jun opnamen in en dur kom een film uut, dur is intussen wè wa mee gedaon vanself, ma daarom iit ut oek MONTEREN ha ha.
Kiek mensen ai t’ goed beschout èmu tog een leuke hobby of nie? Ik vin van wè, wan je ben tur kreatief mee bezig zo asse zeggen en tis nog waa oek, kiek maarus op de klupavonden wadda de sommigen der van weten te maken, petjes af oor, wan tegen die tied dadik dadoek zo kan zank waarschijnluk al in een uus voo bejaarden zitten, voorop gesteld da tie dur dan nog zien, wan da wor volgens mien oek ama minder, das de moderne tied zank ma zeggen.
Trouwuns je zie allerlei films op de klup, da maakut juust zo leutug, dur is ter oek iin die filmt biena altied zun eigen, daar et tie speciaal een stok voo gemaakt zei tie om daa zun camera op te zetten en die outtie dan un eindje bie um vandaon, je moet tur ma opkommen. K’zei toch net nog dadut ama kreatieviteit is zeg noe self.
Ken dur eigenluk noe ma alsma un bitje omeen gedraaid, ma persoonluk vin ik het jammer da tie voozitter dur mee stopt, oek a omda tie altied mien stukjen deurstuurde en noot è gezeid wien ank ben en dan vink toch je woord ouwen. Overiguns enk dur alle vertrouwun in dat un andere voozitter dadoek wè goed za kunnen, dus zaddut mee de klup wè goed bluuven gaon, a me ma ama een bitje meewerken. EIgenluk dienk ik dat ie gliek è da tie ut stokje is aan een ander geeft zo a se da zeggen, self dienk ik altied voo mien maokt ut eigenluk nie so vee uut wien a tut doet, at ma gedaon oor, ma wudder as leden moeten natuurluk oek wè respect èn voo medeleden die an da werk wè voo ons willen doen, anders zou ut nie lang duren mee de klup dienk ik.
Trouwuns volgens dun agenda gaot dien secrutarus dur oek mee stoppen, volgens mien was da altied un bitje un stillen, ma nie as ut op films maoken ankwam oor wan dan stontie zun mannetje so ase da zeggen, dus ank dur vanuut gao da tie noe meer tied gaa dèn om te filmen kunnen we da nog wè wa van verwacht’n de kommende tied. ‘K ben wè benieuwd wie an we noe as secrutarus gaon kriegen, nie dadut voo mien uut za maoken, ma zon mens gao daor toch oek wee weruk an èn, of nie soms. En da ama voorons!! Jeetje zon lang stukje enk volgens mien nog nie gescheven, dus gaank dur vanuut da judder het me nie kwaluk zullen nemen dank der noe ma mee ga stoppen, ma nie voo dank gezeid èn “tot de volgende keer”. Van judder 00X

2013
November 2013 (00Y)
Beste 00X en videovrinden. Leutig, da ge blieé bin me mien reaksie. Ge vroeg oak om der mee deu te gaon. K zal da proberen, maar weet nie of di in dialect zal goan. 
Afgeloopen dinsdag et Cor verteld over die 1 minuut filmkes en ei et r ook verschillende loaten zien. Da was echt leutig.
Oak at ie stukskes uut de krante mee, ik geloof uut de pzc. Ik dink da tie ons wil abboneren op de pzc. Ik eb al iemand gevroagd om die “almenak” stukskes te bewoaren. Wie weet kunne we der nog wa mee.
En die pauzes worren oak goed gebruukt, want der wor flink gekletst, zelfs zo erg dat den voorzitter ons allemoal tot de orde moe roepen, om mee zijn verhoal verder te goan.
Den avond is wel een beetsje uutgeloopen, want der woaren veel filmkes om te bebieken.
Maor voor dieén cluboavond woaren er moar vuve. Da eb k gelezen in de loatste nieuwsbrief. Da is wel jammer, want ik eb eel de zomer flink veel film opgenomen en doar eb k toch wel een leuk filmke uut gekregen. K heb doagen in m’n montage ruumte gezeten, want k wilde toch wel dien eersten pries winnen. Maor dat goat dus nu nie meer deu. Moar loat het ons goe maoken en allemoal meedoen oan die’n 1 minuut film. Tot de volgende keer. Mee groeten van 00Y

November 2013 (00X) Goeiëndag 11
Goeiëndag. Hallo ama, zo an judder èn kunnen zien, è ter iin gereageerd op mun vorige stukje, kiek da è mu nog is goed gedaon, da zit ik noe nog van te gnieten. Kopen natuurluk wè da tie persoon dur mee deur gao te reageren, ma ast kan nog meer van judder natuurluk. Ik docht da begin ik mee om dien anderen persoon te bedanken en te stimuleren deur te gaon.
Ma waaran ik eigenlik docht om wii een stukje te schrieven is om oe ta noe ama ga in de videocub, kiek ik ben a een iile poos lid van de club, ken dur vee meegemaokt, ken er oek zien gaon, ma gelukkig vee meer zien kommen. 
Ma ank dan terug dienk oe à ta “vroeger” op de cubavonden ging in vergelieking mee noe, das biena nie te beschrieven, ma kgaan ut toch proberen, kzie wè oft me lukt.
Vroeger, in de tied van de de VHS-bandjes, eerst die grôôte e laoter die kleintjes dee iederiin oek iil vee heur of zien best, da weet ik zeker, en de sfeer was oek altied wè goed, en ken dur iirluk gezegd iil vee geleerd,en da enk nog altied vee plezier van. 
Ma ak noe is terugkiek was ut toen toch wè een bitje stofferiger as tegenwoordug, ai judder begruupen wak bedoel. Ai dan is kiek oe a da de leste jaren gaot, dan is er toch nog a wa veranderd, gemoderniseerd zeggen ze dan mee un mooi woord.
Wie van judder a ter gloofd da ter nog is van die dingen deur ons clublokaal zouen vliegen. Ken nog is op het programma gekeken en dat eet een “drone”, en weet je wa da t’mooie an is, je kan daor oek nog een camera an vast maken en zo opnamen vanuut de lucht mee maken.
Dien Reinoud è ta ons iil mooi laen zien, nie mee die camara’s oor ma toch we oe da tie dingen kunnen vliegen èèèèn, joor ze nog nie oek. Kiek, ik oor noe wè een bitje bie den ouwere garde, ma ak da zien gaot ut bie mien toch wè un bitje kriebelen, wan da zouk noe toch oek nog wellis willen.
Eèèèn ak mezelf een bitje kèn zou dat er best nog is van kunnen kommen, ou judder art dus ma àvast vast, wan da ga toch wel is gebeuren dienk ik (ma nog nie morgen oor).
En dan nog wa danders, da we in het digitale tijdperk zitten weten w’ ama, wan wie van judder filmt ter nie mee zo’n mooie moderne camera wa à zo vee op die kaartjes kan, dai ma deur kan bluven filmen tot dai je nonsse weeg, en tuus ga ta ama de computer in en kai gaon monteren dat ut een lust is. Wa dèn wudder toch un leutige hobby é.
Ma noe kom ut, dien John uut Iezendieke, die kan ter trouwens oek wa van oor, die dee un presentasie over (even op mun liesje kieken) We transfer, (zo dadenk in ieder geval goed geschreven) das un programma om un film via internet na un ander te sturen.
Kiek dienk ik dan bie mun eigen, an ik nie in de videoclub zou zitten, zou ik dur misschien nie eens ooit van èn goord la staon gebruuken, noe is da leste bie mien trouwens toch een vraog oor, voorlopig toch tenmimste, ma je wiit ma nooit.
Oek kiek ik alluut na dien presentasie over da maoken van een iin minuut film, wan om iirluk te zien zienk da momenteel nog ema nie zitten, dus oop ik dadut licht op dien aovond bie mien wil gaon brannen, anders zak toch moeten passen vrees ik.
Ze zeggen wèllus “wa un wil is is un weg”, ma kweet nie of da wa is wan ik wil wè, ma k’zien toch nog giin weg, dus bie voobaat dank a ta wè zou gaon lukken. Zo mensun da was ut wii vo deze keer, en noe nie ama tegliek reageren, wan dan kan de sait da vast nie meer an. Van judder 00X

September 2013 (00Y)
Beste 00X en videovrinden.  
Ik ben ook van die groep die altied vakansie ebben, maar da wil nie zeggen da ge niks te doen eb. Tiet te kort.
Dus mun ”vekantsie“ zit erop en na nun blik op de sait van de videoclub, eb’k gezien da de graog reaksie wilde. 
K wil da we proberen om aok in dialekt te doen, maor ik weet nie of da zal gaon.
K heb op verschillende plekken gwuund en die dialekten loopen noal es door mekaar. Ook krijg’k van die roje strepen onder mun woorden bii t tiepen. Maor ‘k gao da toch proberen.
In mun vekansie heb k aok veel filmateriaol opgenomen, maoer er verder nog niks mee gedaon. Want da val nog nie mee, om daor iets moois van te maoken. Maor k heb gezien da in t volgend sezoen, daor aondacht aon gegeven oor.
John gaod ons uitleggen oe we van opnaomes van 3 of 4 uur, nen fatsoendeleken film kunnen maoken van ooguit een alfuur tot drie kwartier. Onzen voorzitter zegt dan wel “kill your darlings” maor da dis best wel moeilek. Ge moe eerst de goeie ploatjes zoeken, dan un goed verhoal en dan nog meziek bijzoeken. PFFFFFF, da val allemaol nie mee. 
Maor daorom zitten we oak op de klup, om ier iets van te leeren.
O’ jao en Cor gaot vertellen over dieen iin minuut film. Nou k oop maor dat ie mee oplossingen komt, wan k weet oak nie goed oe te beginnen. K eb wel al un idee, maor of ta wa word da weet k nie.
En dan ebben we aok nog de film voor de clupwedstrijd. K denk dan k hier toch maor es een filmpje voor moe maoken. 
Age niks instuurd kunde er oak nie van lere. Tot ziens op de volgende klup aovond. Mee groeten van 00Y

Augustus 2013 (00X) Goeiëndag 10
Goeiëndag. Hallo ama, mien vakansie zit ter oek wiiral op, nou ja vakansie, ik oor a bie die groepering die an eigenluk altied vakansie èn volgens de sommuggen, ma das natuuluk nie waa, da weten jullie oek wè, wan wudder èn da allang verdiend, dus moeten we der oek van genieten. Ma ja zo ank a zei, de vakansie zit ter op, dus kieken we wii vooruut en natuurluk oek naar ut nieuwe clubjaar van onze de videoclub. Ma noe gaank toch iirst is effen mopperen oor op judder ama, wan ik èn a enkele keren gevrogen of da judder is op mien stukje zouen willen reageren, ma ken nog niks gezien!!!!!!
En zank is wa zeggen, diddis mien tiende stukje goeiëdag, da benk wè een bitje trots op, ma geliek is et toch wè jammer dat ter nog gin iin è gereageerd, judder zitten toch oek in de videoclub, dus zouk zeggen laot is wa van j’oren!!!!
Toch nog effen trug na die vakansie, mense, mense wa den ik het iit gad, ma da was voo judder natuurluk oek zo, ma da betekende wè dak nie vee è gefilmd en da vink eigenluk wè iil jammer, koopen da ta bie judder beter is hewist anders goan we nie vii films te zien kriegen. Daarom enk tegen mezelf gezeid, allé gaa ter noe is tegen an, der is nog genoeg te filmen, oek in onze eigen omgeving, kiek ma is na die film van dien Sjors, van die beelden op den diek in Terneuzen en van die poorten in Ulst, dus benk oek wii a bezig, en om iirluk te zien enk a iil wa mooie opnemen kunnen maoken, ma ja noe moenk da nog en film van maoken, ma zeg ik altied, moed verloren is al verloren, en ai a nie mii in j’en eigen kan gloven ou ut natuuluk ema op, en da gaon we nie doen, dus de wor werken. Trouwens dien voorzitter è me nog niet gebeld , da dee tie anders altied wè, om te vraogen of ik à mee mun stukje bezig was, ik dienk dat tie da nie mii durft, of die è tevee an zun ooft, of is tie nog nie tuus van vakansie mee zun karravaan, da kan natuuluk oek. Ma a tie noe nog beld kank zeggen dank um voo gewist ben, oek wel leutig toch.
Net as de vorige keer enk men leste stukje wii nie eerst gelezen, wan ik kwam der achter dai dan tevee vantzelfde ga schrieven, en mee mien ervaring, ahum, en men tiende stukje moe ta toch kunnen zonder trug te moeten vallen op et vorige, of nie soms.
Ja, weetje wa me nog te binnen schiet, zèn ons gevraagd of da we iin minuut filmpjes wouwen maoken, wan de volgende keer, kweet nie precies wanneer oor, is die vertoning bie ons en dan zouen we der toch oek wa moeten laoten zien, ma ken verdorie nog gin idee wank moe gaon maken, da val nie mee oor, èn judder a wa gemaokt?
Trouwens dien Leen die et ut oek wel in zun vingers oor, noe et tie wii a zon maraton film gemaakt en tleutige daavan is da tur zo vee leden an meedoen, dus oek voorudder is da een ervaring en leer iederiin oe ai zoiets moe doen, ma das nog nie tselfde as zelf doen oor, ma dan zeg ik ma wii, nie geschoten is alties mis, en ai ze daarover oor praoten en ze dur toch ama vee plezier van en das toch oek de bedoeling.
Om iirluk te zien kiek ik noe al wii uut na het nieuwe clubjaar, kben wè iil benieuwd wa se noe wii voo ons èn uutgevogeld, wan je kan zeggen wai wil, ze kommen toch iedere keer wii mee een goed programma, en ik dienk dat ta toch nie zo makkeluk sa zien om da ma wii ama te verzinnen. Ai da goed bie nadiek moei da toch wè bewondering vor èn, maor ik gloof da se da mii een commissie doen, dus eigenluk moeten we die commissie davo bedanken.
Vo mien zou ta dienk ik niks wezen om da an mee te doen, k’ben à blieë dak zelf een bitje kan filmen, laot staan dak mee zou moe dienken wa we mee zun allen zouen kunnen doen.
Trouwens ik moedoek een bitje oppassen dak mijn eigen nie te vee bloot geef, wan dan weten ze zo wienank ben en dan kank er wè mee stoppen, wan dan kai niks meer zeggen en toch annoniem bluuven, da ga vanzelf nie lukken, en iirluk gezegd begin ik er een bitje aardigheid in te kriegen en enk oek een bitje ut idee dank oek wa voo de club doe.
Zo da was ut wii voor deze keer, dus zouk zeggen tot de volgende keer en dan oop ik op judder reaksies te kunnen reageren, da zou nog us leutig zien. Van judder 00X

Februari 2013 (00X) Goeiëndag 9
Goeiëndag. Beste mènsen, k’ben eema uut mun doen, want noe kom ik wee a mee un stukje, ma da kom omda’k eema onder dun indruk ben van oe da ta noe op de videoclub gaa, en da ben’k zo blieje mee, want je moe is goed kieken hoe da ta ga de leste tied, der kommen echt vee leden opdaogen iedere keer, en oft noe an mien ligt weet ik nie, maa het liekt oek wè oft noe gezelliger is, maa ik kan nie zeggen oe dak da noe precies bedoel, das meer un gevoel, ma wè positief, dur angt un sfeertje dak nie kan beschrieven. Kiek anders ak an mun stukje begin lees ik eerst ut vorige, ma da enk noe oek a nie gedoan, dus das wè un bewies dat tur wa mee mu an dant is. Voo da bestuur moe ta tog oek wè leutig zien, ai vanallus probeer torganiseren en ut loopt lekker dan moei da tog een goed gevoel bie èn.
Die nieuwe die doen oek goed mee oor, daa ben un paar echte fantieke bie, da kan ik biena nog van leren, die laoten oek a films zien terwiel ik na zovee jaar dur nog ma 2 è loaten zien, da èmme wè ant dienken gezet, en ut resultaat is dak besloten è om dur oek is wa meer tegenan te goan, dus zet judder ma a vast schrap want tsa tur tog is van moeten kommen.
Dur ben oek un paa nieuwe bie die an dur best wè à wa van weten, das best wè goed, iin da van è vroeger oek al is lid gewist da weet ik nog wè, noe è tie intussen oek nog wa cursussen gedaon en da kojjoek wè zien an da filmpje van um wa dat tie oek foto’s in a gebruukt, da vonk best wè mooi om te zien, misschiem gaak da doek us proberen.
En dan da dechtbaar uut België, da ben oek gin beginners oor das wè zeker, da èn me oek a un bewies van gezien, en koopen dat ze dur nog meer laoten zien.
Wènt de leste tied al un paa keer gat over oe ai un film van danderen moe bekieken en beoordelen, da vonk iil goed wan da was wè nodug, koopen dus da ta noe oek golpen è, wan volgens mien is da iil belangriek, wan tis net zo as ze zeggen je kun vee van un ander zun film zeggen, ma doe teerst zelf maar us, en wa oek belangriek is da ai wa zeg je da wè mee respect doe wan daor èt iedereen recht op, kweet wè damme da al is eerder adden gedaon, ma twas dienk ik un bitje weggezakt, ma noe was dun uutleg toch oek wè un bitje anders en beter voo zovere ik da kan “beoordiilen”, dus oop ik dat tgaa bluuven. 
Wèn de leste tie oek nog a wa “projecten” waarrà de videoclub an mee werkt, das tog wè wii wadanders dan an j’eigen film te zitten werkun, en ai da dan oek nog us saomen mee anderen kan doen is da tog wè leutig en ik dienk oek wè leerzaom, wan je ziet oek is oe da in ander ut doe. Hè noe enk mun art is kunnen luchten, da doe goed, en dan te bedienken dat ti eigenluk ma een tussendeurtje was, moenk misschien ie vaoker doen. Alléé vô deze kiir gaank dur wii me stoppen.
Tot op de club en mun volgende stukje, je weet ma nooit, misschien bèn jie dan we t’onderwerp, ma da moei nie bange vô zien oor want ga altied gemoedeluk zo aij ier boven zelf wè kan zien, en ait tur nie mee iins ben dan schrief je toch zelluf es wa!! Van judder 00X

2012
December 2012 (00X) Goeiëndag 8
Goeiëndag. Hoera, noe ben’k dien voozitter wellis un kiir te vlug af, ij emme nog niks gevraogd en ‘k ben à bezig, da zatum wè un bitje tegenvallen dienk ik. Ma ja, tis oek nog vroeg é, anders schrief ik mun stukje aoltied pas tegun de kerst
Mao, kmoe wè zeggen dat tie wè gliek a die andere kiiren dat tie me vroeg waa a mun stukje bleef, dan ak ut ma nie moeten blooven, ma noe moek ur nutuuluk oek wè wa van maoken. Weten judder wa?, nee?, dan gaank zelf ma an de gank.
‘Ken eerst wii mun vorige stukje gelezen, ma daorenk noe nie vee an gat, dus da wor werken. Ja kweet we wa, ‘ken een poosje trug an judder gevroogen om is op mien stukje te reageren, deur oek is een stukje te schrieven, ma ‘tloopt iirluk gezegd nog gin sturm begruup ik wan kèn der nog niks van gezien. Wèn dur iil wa nieuwe leden bie, en wadan ik noe zo leutig vin is da die zo goed mee doen, ze doen ut verdorie nog beter as ik, da kank eigenluk nie op me laoten zitten, wan ik ben a vee langer lid, dus zittur ma iin ding op en dadis dak er tegen an moe. Ken allus un film laoten zien oor ma twor tied vo un volgendun, kom 00X antwerk.
Kentur a vaoker over gat, ma die sait van de videoclup das nog is de moeite é, daa moei nog a wa voo doen om da zo te kriegen. ‘Kmoen iirluk zeggun dank regelmaotig kieken en iedre kiir sta tur wii wadanders op, ma zouwen ons zo wè op doogte.
Soms moek wèllus op wa trug kommen, zo as noe over dien John, ak die zo is bekiek op de clupaovonden, kank alliin ma konstatiiren da tie de leste tiet nie mii op ladders kruupt, want ij loopt tur bie as een kieviet en das un stuk beter as un poos geleejen, glukkug mà. En dan dien Leen, die kan tur oek wa van, die maoktur gloof ik een gewoonte van om kiir op kiir die klupwedstijd te winnen, ma dan dienk ik, je moet ma kunnen en dan moet te rest mao us beter zun best gaon doen. Ma ‘tbuuf natuuluk een vraog of ik dur bie was of dank ut van ooren zeggen èn, wan mun identiteit bluuf gheim, alliin die voorzitter weet wien ank ben en ij è beloofd ut nie te zullen deur vertellen, en datet tie oek nog nie gedaon, daarom stuur ik mun stukjes oek via èm deur, dus voorlopig zit ik nog goed, en weejewa’tvoordeel is dai da anoniem kan schrieven, dan kai alles zeggen, natuuluk wè op een nette manier en je moe wè fusoenluk bluuven, ma da doenk toch? (kom mensen reageer noe us!)
De projectie van de films gao we goed é, das glôôf ik wè een goed ploegje die an da doen, en weetje wadoek zo leutig is, da te films zo grôôt worren afgespeeld, das toch wadanders dan tuus op je tillevisie, en da ta dan toch nog zo scherp is, zellufs nog die beelden van mien camera en das nog gin HD oor, toen an ik mun film èn laoten zien, da vonk fantastisch, da kan un mens noe is echt vrolijk van ooren. Trouwens tis allemaol leutig bedoeld, dus dur èt tur gin iin reden om sagerienug tooren, wan zo ak in mun vorige stukje a schreef, an sagerienige mensen èn me niks, dus mensen kop op en vrolijk deurgaon we kriegun ama wellus un beurt (alliin ikke nie). Noe enk un probleem, wan ik weet niks meer te schrieven, ma ik zie dak oek a vèrre an donderkant van mun velltje zit en ik èn altied gezeit dak iin velltje wè genoeg vin. Alléé vô deze kiir gaank dur wii me stoppen.
Tot op de club en mun volgende stukje, je weet ma nooit, misschien bèn jie dan we t’onderwerp, ma da moei nie bange vô zien oor want ga altied gemoedeluk zo aij ier boven zelf wè kan zien, en ait tur nie mee iins ben dan schrief je toch zelluf es wa!! Van judder 00X

Augustus 2012 (00X) Goeiëndag 7
Goeiëndag. Tis me wii nie helukt, noe è tie voozitter me wii moeten bellen om te vraogen of dak mun stukje vo de sait van de club al à gemaokt, nii vanself, dus noe moek is vlug an de hang. ‘Twor trouwens is tiet dak da voortaon self is an ga dienken. Ik behin altied mee men vorige stukje te lezen, dadenk noe oek wii gedaan dan krieg je toch wii wè ideetjes oor.
De vorige keer enk’t gat over de beroemteit in onze club, dien Leen mee zun pries, en toen enk de vraog gesteld “wie ga tu volgendun zien”, noe wa dienk je, lapt tie ut wii om voogedraogen toorren, dat ouw je toch nie vô moogluk, t’wor tiet da tie ons us ga vertellen oe da tie da lapt, èn we gliek wii un leuk onderwerp vô un aovond, en dan kriegen wudder oek us een kans, mao alle gekheid op een stokje, ij flikt ut toch ma, wa of nie, en noe ma oopen da tie film wii op da festival in de priezen valt, mao das afwachten. Ken un paor stukjes trug is gevraogd of judder is op men stukje wouwen reageren, mao tot noe toe et ter nog gin iin wa laten ooren, ik zou zeggen la ma kommen, judder ben toch oek lid van de club, dus tis for ‘t goeie doel.
Di jaar bestond de club vuufentwintig jaar, dat èn we gemerkt, daar èn ze nog a wa aan gedaen, en terecht oor, het is wellis goed om an de weg te timmeren zo asse da zegg’n, een open dag mee een Wetouwer en mee Elsa van Hermon van omroep Zeeland, da was hartstikke leutig toch, en dan dien avond in Oostburg, da benk oek gewist en da enk gin spiet van, da was gewoon goed opgezet, een paar drankjes en wa hapjes en vee gezelligheid, mee onze wuven durbie, of venters nutuurluk, en der waren oek vee van de nieuwe leden die an die cursus gedaon èn, achteraf ènk spiet dak da oek nie an meegedaon èn, want ak da zo is anoorde van de sommuggen is da best wè intrussant gewist, ma ja telaat é.
Trouwens we worren wè mee den dag beter ingeligt, in diirste plekke mee onze eigen sait en nou oek nog us mee die Nova sait en dan oek nog us Niewsbrieven, ken ter druk mee ma nie iirluk, want ak iirluk moe zien is da best we ama intrussant.
Weetje waddoek zo leutig is, bie die “niewe” leden, die an die cursus èn gedaon, zien oek wii iil wa vrouwn, zo da de veroudink tussen de venters en de wuven een bitje in evenwicht komt, net zo ak in mun virige stukje à schreef, viedeofilmen is toch nie alliin vo venters, dus zou’k tegen die dames will’n zeggn, “zettum op, la zien dai duroek bèn” wan dur bin oek dames in de club die an á langer lid zien en die kunnen der oek wa van oor, alléé das mien mening è, ma in mien stukje mag ik toch zekers men eigunste miining we zeggen zeker. Maa wak nog we an alle “niewe” kwiet wil, ma das natuurluk oek mien menig, je kun op de videoclub iil vee leren, ma je moetut natuurluk we vraogen ai iets wil weetun en oek je films laoten zien en dan nie bank zien vô krietiekun, wan oek da kaj vee van liiren. Over dien John kank deze kiir niks schrieven, gelukkug ma, tga nog à goed mettum, zolang à tie ma nie op un ladder kruupt. Tuur nog we even vô we wii beginnen mee de club, má k’oopen dat wii een leuk oor, ik kiek ter altied naaruut, alliin ist jammer da te zoomer dan wii vobie is, oewel zoomer! Ma latun we noe má optimistun bluuven, wan an sagrijnige mensen è mu toch oek niks. Ken wel us gedocht, ‘kga maor is stoppen mii het schrieven van die stukjes, ma ak iirluk moe zien begink dur aardiggeid in te kriegen, dus judder ben nog nie van mien af. Alliin vô deze kiir gaank dur wè me stoppen. Tot op de club en mun volgende stukje, je wiit ma nooit, misschien bin jie dan we t’onderwerp, ma da moei nie bange vô zien oor want ga altied gemoedeluk. Van judder 00X

2011
December 2011 (00X) Goeiëndag 6
Goeiëndag. Gelukkug benk die voorzitter noe te vlug af, ei è me nie oeven bellen zo as vorige keer om te vraogen wa a mun stukje bleef, ma noe moek er natuurluk wè wa van maoken, ma wa? O ja noe èn we een beroemteit in de club, wa zeggen judder da van, die Leen die èt un pries gewonnen op da groate festival, brons notabene, wie à ta durven oopen, maa da gif de burger wè moed, dus t’ kan wè zo ame zien, wie ga tu volgendun zien, da zou toch we leutig zien é a me da nog is mee mogen maoken, kzou zeggen mensen doe je best want van mien moeit nie èn oor, ik scharrel wè een bitje mee ma dan eit wè gat, ma da scharrelen vink oek a leuk oor. J’èn trouwens oek a een film van mien gezien, ma k’zeg natuurluk nie welkun, dus ken men woord gouwen zo ak in mun vorige stukje èn geschreven, kvon zelf ak iirluk moe zien da te krietieken nog a mee vielen, en wattur gezeid wier was ik ut eigenluk best we mi iins. In mun voruge stukje enk gevrogen of judder is op mien stukje wouwen reageren, da benk noe natuurluk we benieuwd na, ma da zak pas weet’n as ut nieuwe clubblad uut komt en da wor pas na de kerst of zo, dus moenk nog even geduld èn. Zo ak “in de wandelgangen” è gooren is de groaten aovond di jaar wè wii goed gewist, gelukkig ma, wan ken wè begreepen da se dur een punt achter zouwen zetten at niks zou ooren, en da zou toch eigenluk we jammer zien, ma dan ligt ut we an ons want z’èn ut wè gorganiseerd. Oek waren dur di jaar 3 priezen en die waren bepaold deur den iile groep, dus nie meer wudder en de partners apart, nii ama tesaomen, da vink oek leuteger. Over dien uutslag gaak niks zeggen wan de sta oek ama op op onzen sait. Noe ak ut toch over die sait èn, das knap werk é, oe krieg tie John da vomeka en biena iedere keer ai kiek is tur we wii wa veranderd of dur bie gekom-men, ent nieuwste is da tie dur noe oek een nieuwsbrief bie è gemaokt, ik kiek graog en gereguld op die sait, daa kom je vanallus tegen. Wèn dur wii een vrouwe bie op de club, en da vink toch zo leutig, verdorie videofilmen is toch nie aliin ma vo mannen, koopen da tur nog meer bie kommen, en mannen oek oor, das toch vee leutiger as ter een iile boel lid van de club zouen zien. Ai is wisten wa dan ik op de club à geleerd èn das biena nie te gloven en iederiin weet we wa, ank da ama zelf a moeten doen was ut vast nie goe gekommen, dank je wel judder ama. Ma ik moe we iirluk toegeven dank ur nog a moeite vô moe doen oor en ak dan die films van danderen zie benk eigenluk we een bitje jaloers en dan dienk ik dikkels, kwou dank da doek kon, ma ik werk tur wè an en kgaan dur van uut dat het toch langzaam an beter oor. Dien John, die kan du roek van van é, noe è tie à 2 keer een grapje gat, de leste keer mee zun voet, en toch ma rond scharrelen op de club, petje af oor, ma filmen kan tie das vo mien zeker. Wèn dur nog we meer die da kunnen ma da weten judder oek wè!. Ut schient dat te club kommend jaar vuuventwintug jaar besta, das al un iile poos, oe èn die mensen da toen gedaan mee de spullen die dur toen waren, ak daar an dienk krieg ik da groate bewondering vô, wudder doen da ama mee de computer, ma da was toen nog nie zo, kuj je je da voorstellen, die moeten toch af en toe èn zitten zwiiten om da vô mekaar te kriegen, k’èn dur eigenluk giin idee van oe ze da toen gedaon èn Ank wak noe geschreven èn zo is na kiek, dienk ik zo van noe ist we goed oor, k’zit wee à zo wa an un iil velletje vol en das vo mien eigenluk wè genoeg, ze kunne nie mii zeggen dak mun biedraoge nie lever, mà kmoe we goe dienken wak ga schrieven, ma tlukt toch iedere keer wii om een velletje vol te kriegen. Kzou zeggen tot ziens op de club. Van judder 00X

Augustus 2011 (00X) Goeiëndag 5
Goeiëndag. Jandorie zeg noe was ik toch vergeten mun stukje te schrieven vò tklupblad en tis à eind julie, ma de voorzitter è me gebeld, ut bestuur à vergadering gat zei tie en het clubblad was ter sprake gekommen, en toen docht tie ineens da tie nog niks van mien a gooren, dus ing tie an de telefoon vanzelf. Dus da gaak ma wii é want beloofd is beloofd, ma kweet nog nie wa, ma da kom we. Om te beginnen enk ut vorige stukje nog is deurgelezen, da geef soms inspiratie!! De vorige keer enk geschreven da kvon da ut nivo van de films omoog was gegaan, da wi zeggen, vò zo ver da ik daa over kan oordiilen, ma ik bluuf bie mun mening, ut ga steeds beter. Zelf benk oek wii bezig mee un filmpje, da wor dan twiide dak ga laten zien, ma tis nog nie klaor oor, ut vorige èn ze nog a over iin gewalst, zo ak à zei, na da se uutgepraet waren was ik a zon bitje onder de taofel gekropen, ma toen ak er nog is over nadocht an ze we gliek, dus enk er van geleerd oor echt waa.
Sinterklaas was a lang voorbie en kan nog giin nieuwe camera, dus docht ik na lang dienken noe ist we goed oor, dan koop ik er zelf we iin, kan iets leuks in men ooft, dus ik na de winkel, konnen ze die voolopig nie leveren want der was dien aard-beving gewist in Japan en alles was da ontregeld, dus iirst laat Sinterklaas ut afweten en noe de producent, tmoe oek nie gekker worren. Mà noe enk pas van de winkel gooren dat er schot in ant kommen is, dus dak de camera iirdaags we zal èn. Intussen is de zomer à wii alf voorbie, ma ze zeggen altied da wudder filmers tiile jaar deur moeten filmen dus kank voor-lopig wè vooruut, kan alliin ma beloven dak men best za doen, wan kmoe oek gin mooi weer filmer ooren natuurluk. Ken na men vakansie nog is gekeken en men Pinakel è nog steeds twii van die beeldlijnen, der ben der nog giin bie gekommen, ma ik kan der nog steeds mii uut de voeten, dus laak ut voorlopig ma zo. Ai zo is in die videobladen lees, dan kommen der elke dag gloaf ik wè nieuwe cameraas en programmaas uut, vrop gesteld da se die oek kunnen leveren natuurluk, ma wie koopen die dan ama, wan ik ga der van uut da as se die nie verkoopen oeven ze oek giin nieuwe te maoken zouk zeggen. Ank dan naa mezelf kiek oe vaok an ik un camera koop, dan zullen ze da nie riek van ooren, oe is da eigenluk mii judder?, da oor ik moek zeggen weinig van. Joor wè is datter iin un nieuwe camera koopt, ma toch oek nies so vee, en ai dan bedienkt da wudder toch de camera consumenten zien, wa bluven die dan ama? Noe bedienk ik geliek, dat ut toch gek is, da at ter zo vee cameraas worden verkocht, waarom zien die mensen dan giin lid van de videoklup of kunnen die da ama van udder eigen?? Ak na men eigen kiek moek da geliek ontkennen, ak nie op de videoklup a gezeten, weet ik zeker dak nog giin enkel “fatsoenluk” filmpje zou èn gemaokt dak an en ander zou durven laoten zien, en natuuluk wii de vraag oe is da mii judder?, konden judder da zooma ama wè zelf zonder daije da ulp bie nodig à, ik kan me da nauweluks voorstellen, ma goed der bèn der altied da an alles kunne tot da ter op aon komt. Ik oopen da we wii een leuk seizoen tegemoet kunnen zien waaran we wii vee zullen/kunnen leren, dus gaak men stukje ma wii afsluten want ik kom wii a aarig in de buurt van het A4 tje, en da vink we wii goed. En…. ait es nie mee meniins ben é, en da kan toch of nie soms, schrief da dan oek is in het klubblad, kriegen we aksie en reaksie so a ta iit, en volgens mien is da leutig, komop zouk willen zeggen geef mien oek us kommetaar. Nou tot ziens op de klup, maa„k bluven we de groaten onbekende à judder da goed vinnen. Van judder 00X

2010
December 2010 (00X) Goeiëndag 4
Goeiëndag. Noe gak es beginnen mee mun stokpèrtje, de groaten avond, da was nog a wa anders é deze keer, en druk, zo ek ut lang nie mii gezien oor. K von t eten oek best we lekker moek zeggen. Ma de films, da zat nog a wa verschil in oor, van die 11 films von ik er zesse of zeven wè eel goed, die enk oek een goed siefer gegevn, ma der waren dur oek een stuk of vier vuve die vonk iil wa minder moek zeggen en volgens mien kunnen die het best we beter, laatut dan oek zien verdorie.
Ma da zaj altiet ouwen oor in een videoklup wan iederiin è even vee rechten, so is da en nie anders, en da moe oek zo bluuven ai een goeie klup wil ouwen. Kvin trouwens toch wè dat nivo van de films in talgemiin ant verbeteren is, volgens mien kom ta om damme ma stug deurgaan mii opbouwende kritiekn te geven, a ben der altied die da nie zo goed tegen kunnen, ma die a ter we na luusteren zie joek duudeluk vooruut goan, dus volouwen zouk zeggen, di is oek iin van mien stokpèrtjes, en weetje waarom, omdak da zelf oek iedere keer van leren. Kwee nie of ut a mien ligt ma kvin dat nog a lekker loapt in t niewe klupjaar, net of ter iets is zo van we gaon der vo en tope kommen wè verder as alliin, wa of nie wa. Kèn noe oek is un film loaten zien, ma ak ut goed begreep ak da beter nie kunnen doen wan der bleef nie vii van over, na da se uutgeproat waren was „k a zon bitje onder de taofel gekropen, tot da die voorzitter zei dak gewoon deur moest gaon, ma wè over de gemaokte kritieken moest nadienken, ma da benk oek wè van plan. Na tvorige klupblad was ter nog un nakomelin-getje, da sat nie bie ut klupblad toen a se da verstuurden, noe das ma goed da se da nog nagestuurd èn wan da ek nog a leute van gat zeg, die a geschreven of da tie zn kompoeter was, da wi zeggen mii dogen van un kompoeter. Wa enk leute gat, kzag tgewoon voo mun oagen gebeuren, de tranen liepen over mun bakkes van de leute, zo iets moei af en toe us èn é so is lekker lachen. Ka nog goopt da sinterklaas di jaor een nieuwe caomearao vo me zou èn meegenomen,nie uut Spanje oor asjeblief zeg, maar zon echten uut Japan bevobbeld, ka zelf a een idee welke ak zou willen èn, ma twas wii nie so, waarschienlijk nie genoeg brave gewist dienk ik. Laak ma open dat ie camera int vat zit en nie te ga verzuren wan dan enk vii pech gat. Trouwens om op de cameras deur te gaon, die worren oek mii den dag kleiner en toch kunnen ze meer, begruupen judder da wa van, noe ik nie so oor, oe kriegen ze ter ama in zou je zeggen. Noe èn ze der oek al iin da kajje zon kop opzeten dan kujje in 3D filmen, ik docht das wa vor mien, kank oek en de blits maoken, ma da benk gouw van trug gekommen, wan dan moe je biena al je apparaten gaon vervangen begruup ik er uut, en noe en ik de pech da mien vader
giin rokkefelder iit dus da ga me nog even mii wachten. Ai trouwens alles zo is een bitje bie ou dan kom je der achter da bevobbeld over die programmaas wa a je films mii monteer, dan kai da oek nie mii bieouwen oor, kgloof dat ter iedere dag we een niewen uutkomt, den enen nog beter dan den anderen. De miisten in de club èn net as ik Pinakel wan ja je wil ter toch bie oren é , ma der bin der, enk oren zeggen toch oek a, die an da een bitje va trug kommen omdat ie ma un pa beeld
sporen è en al die anderen programmaas vii mii, ma ik è ter nog nooit mii dan twii nodig gat dus vo mien ist nog we goed zo, ma misschien is da gliek we un bewies dak nog ma un broekje ben op da gebied. Om dak mezelf vogenomen a om telkens nie mii dan iin A4 te schrieven, en oek om dak noe eigenluk nie vii mii weet, gak der ma een punt achter zetten in dope da judder wii un bitje van mun gezwets en genoten en zo nie dan èn judder pech, want mien stukje is klaor. 
Ama een prettige jaor wisseling en un goe nieuwjaor. Van judder 00X

Augustus 2010 (00X) Goeiëndag 3
Goeiëndag. Hallo ama, tis wii a men vierde stukje voo t’ clubblad, ’t ga best we goeté. Ik kom nog even trug op die rage over da strenger beoordiilen, daar èhme best wè een leuk testje mee gat mee da filmpje over die vissersboaten, da vonk eigenluk best we goed om da zo is te doen, en om iirluk te zien gloof ik da tè golpen, we goan vooruut. Ak noe iirluk moe zien é, ben dur bie ons oek wè wa da elemoal nie voo ga elpen, die luustren amper en trek’n zich der niks van an, want de volgende keer ist wii net zo mee udder filmpje, dus vo die et ut dus nog nie golpen. Maa je weet ma nooit. Oh ja mun stokpèrtje, de groaten avond, da konk vorige keer nog nie over schrieven, maa noe wè, aliin is de vraog was ik er of was ik er nie. Kiek, of ik ut noe é va meself of van oren zegg’n is nie belangriek, tis mun miining die telt en mien miining is da ter véé te weinig leden na dien aovond komm’n, dus da moe wa an worden gedaon oor ik iederiin zegg’n, ma wa?, das nie zo eenvoudig ast liekt, vroeger, volgens de overlevering, was ter nog wel es een etentje mii un bingo der achter an, noe is bingo niks vor mien oor, ma der ben anderen. Toch dienk ik da a we wa willen mii de partners, we misschiem toch wii es an een etentje moeten dienken en dan daa na misschien is na de films kieken, tis ma un idéé, k’gooi et ma in de groep.Der zull’n vast nog we miir ideëen zien , ma k’en der nog gin gooren. K’open wè van arte dak an teind vant jaor der een leuk stukje over kan schrieven. Tis an judder, ja oek an mien oor ma k’ben ant dienken en das a iil wa. K’bén un bitje loat mee mun stukje, ma da kom deze keer wè goed uut, want w’èn un mailtje gekregen van de secretaris mee un enkètte, dus voo mien wii un aanknooppunt om wa over te schrieven in mun stukje. Kiek mensen we kunnen zeggen wa we willen, ma da bestuur probeert het toch wii om ons naa onze miining te vroagen, k’oop wè dat ter wa uut komt, k’en het, noe ak di schrief, oek nog nie ingevuld oor, maa k’ga we doen, want a we niks late oren weten die mensen oek nie mii wa ze noe moeten en om iirluk te zien kiek ik a wii uut na wa we ama gaan doen a we wii beginnen, ma noe eerst is de zomer uut doen want die doe oek nog a z’n best di joar, tis toopen da de leden ut nie t’ iit vonden om te filmen want dan èn w’op den duur ema gin films mii en da zou toch wè zonde zien. W’èn di najoar da film festival in Terneuzen, das voo ons noe oek is un kans om te zien wa al die anderen dur van maoken, k’oop da twa wor wan dur za vast wè wa werk an zien om da rond te kriegen, ‘kan noe a wè zeggen da as se me vraogen om telpen ik jao ga zeggen wan zonder ulp za’t we nie kunnen.dienk ik. Ka me voorgenomen om nooit un groater stukje te schrieven dan iin blaodje en da ek noe dus gaon’k dur ma mii stoppen en a me gezond bluuven ooren judder ant teind van tjoar wii van mu. De groeten éé, èèèèènuu, vee video plezier é van 00X.

2009
December 2009 (00X) Goeiëndag 2
Goeiëndag. Hallo ama, tis wii a men derde stukje voo t’ clubblad, ‘k begin der an te wènen en wat mooiste is datter wii iil wa te vertellen is, ja mensen judder leveren zelluf de stof an waa an ik over kan schrieven, dus eigenluk ek het makkeluk. De vorige keer ènk gezeid dakket noe over EMOTIE zou èn, noe da kom ut dan. Eerstes à die nieuwe rage, de films moet’n strenger worden beoordeeld, da benket trouwens best mee eens oor, maa de neuzen staan daabie nog nie in dezelfde richting enk gemerkt, komt die voorzitter mee un in mien ogen goed voorstel om dan in categorieën te goan werk’n, bin der wii die da nie zo zien zitten, oemoettut dan dienk ik, je moe toch eerst es wa proberen, maa wen der nog nie vee van gemerkt, ze ben nog steeds even broaf voo mekaar, zo gaat nie werken, maa tsa z’n tiet nodig èn dienk ik dan, ma dat goed ga kommen weetuk zeker, geduld, ma at goed is goawe der ama op vooruut en das noe net de bedoeling. In het vorige clubblad schreef ter iin over oe die mee de vut ging, iil leuk stukje en ie at oek nog tips en ie zei oek dattie et best na zun zin at op de videoclub en da tie oek mii films zou gaan kommen “in de toekomst”, dus wudder noe maa wii wachten ee. Dur was ter nog iin die schreef een veraaltje in videotermen over oe die onderuut gegaan was op ‘t ijs, de tranen op mun wangen vant lachen, maa da veranderde nog a want ut bleek da tie toch lilluk terecht was gekommen, maa daa at tie dan wee een statief an over g’houwen, wa zou Kruif oek a wii zeggen?, ma tsai je toch ma effen gebeuren dai j’even ga schaatsen en dan mee zukke gevolgen. Gelukkug loop tie wii. Was da ier boven EMOTIE of was da EMOTIE!! Judder maggen tzeggen. Ut liekt ter oek op da we goeien dag (das oek toevallig) moeten zeggen tegen iin van onze beter filmers, die ga na Brugge enk oren zeggen, en dan te bedienken dak um nog èn zien kommen, toen kon tie ut nog nie zo goed oor, ma deur de kritieken, tips en opmerkingen is tie iil vee verbeterd, dus ei tie toch tiin en tander an onze club te danken, ‘k oop da tie da oek zo zie. Trouwens van mien mag mag tie bluuven oor, iederiin è recht op zun eigen mening en bie ons mag iedereen oek zun zegje zeggen, ma je moe natuurluk gin kruutje roer me nie zien want dan gaat nie, ma ‘ka trouwens dun indruk da ta bie die Jan toch oek we ging. O ja, we moesten di jaar oek wii terug naar de basis, ma die ant gevraagd èn enk nog nie zo vee hezien, ma tis wè wii gedaan, da wi zeggen die voorzitter et ut wii wè gepresenteerd, ma ‘kdienk da te meesten da wè a wisten en die waa tie ut voo dee enk toen oek nie gezien volgens mien, maa ja tis wii geprobeerd waar of nie en je steekt ter toch altiet wii wa van op. Mensen dienk toch eerst es na voo daj zoiets vroagen. Jammer da tie groten avond nog nie is gewist noe ank di schrief want da vink altiet zo leutug, zeker om over te schrieven, ma da is dan wii voo de volgende keer, dan enk in ieder geval wii wa om over te schrieven. ‘Kwensen judder a vast een voorspoedig nieuwjaar mii iil vee goeie films, want ‘tkommend jaar is ier toch da festival, ‘ken gin idee oe da za goan ma ik kiek ur we à naaruut, want dak ga kieken is we zeker, judder toch oek we? Vee video plezier van 00X.

Augustus 2009 (00X) Goeiëndag 1
Goeiëndag, da ben’k wii, want ait belooft moei’t doen oek. Kèn begrepen da men stukje nog a in goei aarde is gevallen, dus gaan’k ma wii is an de slag, we zien we wat ter uut komt. Wak eigenluk best we leutig vin is da ze nie èn zitten vissen wie ank ben, of kent nie gooren da kan oek, die voorzitter è z’n belofte gouwen en niks gezeid, ma da at tie oek a me beloofd. Om te beginnen vonk ut nog a rommelug di jaar op de Videoclup, wa ter noe a ma nie veranderde op da programma weet ik a nie meer, zo vee was da, maa dan kom men vergevings gezinde kant wii boven en dienk ik “ja jie moe’t nie regelen”, ma da bestuur wè en volgens mien valt ta af en toe vast nie mee, die mensen ent vast oek nie makkeluk om tama wii voo mekaar te kriegen en vo mien ist teigenluk ut belangriekst dak mee mede sieneasten, ahum, kan praten en van ieder iin we wa leer en daar ist mien om te doen, da zit je toch for op de videoclup zegg’n altied en natuurluk de films bekieken, ma da was di jaar ier en da oek we wa minder as anders, a ben der we uutzonderinge vanzelf, dus mien advies, ahum, is da we der di jaar is tegen an moeten, want ak’t goe begrepen en, is ter volgend jaar ier een groot festival en ik vin da wudder da oek bie moeten zien mee een pa films, k’ga zeker kieken, das vast, judder toch oek we zeker? Wak in’t vorige clubblad oek zo leutig von is da die redacteur, ahum, der een spelling sjekker op wilde loslaten, waa aalt tie ut vandaan zou je zeggen, zon ding besta toch volgens mien elema nie, of kmoe me vergissen wan je weetut ma nooit tegenwoordug. Noe we’t toch over zukke dingen èn, de veranderingen in die apperaten ouwen oek nie op, echt waa, je kun kiezen uut bandjes, schieven en van die pietluttige kaartjes, om over de siestemen ma te zwiegen wan dan is’t eema un zootje, kwee’t af en toe oek nie mii, ma dan kank’t in ieder geval nog wè vragen èn krieg nog antwoord oek, èt ta bestuur nog wè tiet om te filmen zou je zeggen ai iile dagen moe zitten studeren op die nieuwegeit, ma vo ons ist we makkeluk of nie soms. Wèn van’t jaar oek nog a wa uutwisselingen gat en da vonk best we leutig, dan zie j’is wa en ander der van terecht briengt en das oek leerzaam. Kom je dur oek is achter dat mee ons toch nog we ga, alliin die mensen uut Brugge die kunnen dur wa fan oor, daa kunne we nog wa van leren, ma da kom oek we a we ma geduld èn, èèèn am me der wa an doen!!! Dien avond mee dien Ko Vlees… (nog wa, ma da wee’k nie mii), da vonk wè eel goed die èt tur we verstand van oor, ma wa mien ‘tmeest is biegebleven, en k’hoop dak da nie mii vergeet, is dat tie zei “In een goede film zit emotie”, kiek daa gaa’k noe voortaan ekstra op lett’n want de sprak me we an en ‘k begruup oek iil goed wat ie da mii wil zeggen da de emotie uut de film je moe pakken, dan ist pas goed gemaakt en da wik oek berieken ast kan, dus j’èn nog wa va me toegoed, zet je ma a vast schrap want t’komt ter an in t’volgend seizoen. Z èn ons cluplokaal oek un bitje opgeknapt en ‘k moe zeggen ‘t is tur inderdaad op vooruut gegaan. W èn noe oek meer projecteurs, filmdraaiers za’k ma zeggen, das oek un goeie zaak dat nie aama op dezelfden terecht komt, noe ei teminste nog es reserve at nodig is. Om eerlijk te zien zouën we aama es wa meer moeten doen in de clup en nie alliin ma zitten te konsumeren, ik oek oor das zeker want daa zouën w’aama plezier van èn en geliek meer betrokk’n zien in tiile gebeuren, ma ja oe pak je dat an, je kun moeiluk zeggen ga us opzieë nu za ik us wa doen, ma we kunnun toek vragen, want da kun m’n oek a m’n iets nie weten. Ak ‘an die groten avond dienk an ‘teind van tjaar zit ik me noe a te verkneuteren mii de gedachte wa die “partners” wii van de films gaan dienken, da bliek uut de cijfers die ze davo geven en wudder ma in spanning afwachten wie dur noe wii as winnaar uut de bus komt, want ‘k ent vorige keer a gezeid die partners dienken d’ur iil anders over as wudder, k’ga nie in herhaling vallen ma ‘k wil et toch wel even gezeit en a da ma wiit. Zoo mensen da was wii zo’n bitje mien veraaltje vo deze keer en ‘k ga noe a een bitje nadienken wa’k volgende keer is ga schrieven, o nii da ga nie ‘k moe eerst nog weten oe a judder je gaan gedragen in ’t begin van volgend seizoen want da gaa’k natuurluk over schrieven en weet je waarom, da’s EMOTIE. De groeten van 00X (ja der is èèn 0 afgevallen da was un bitje te vee van’t goeiè).

2008
December 2008 (000X) Goeiëndag 0
Goeiëndag, k’ben a jaren lid van de videoclub dus noe wil ik oek wel is een stukje schrieven want daar vragen ze steeds mar om, mar der is nog weinig respons op gekommen dus ga ik het is proberen, mar gin negatieve reacties é want dan doeket nie meer. Wak eerst wil zeggen is dat judder allema wel fanatieken ben or, as je de vragen allemaal oor iedere clubavond wee, ben’k blieje dak gin voorzitter ben want die moet t’ama ma weten, en ma deur vragen, mar kmoe we zeggen k’leer ter vee van, kluuster oek altied scherp en probeer der oek wa mee te doen en warrachtig t’werkt, je merk daj vooruut gaa en daar gaat t’om. Waar koek vee bewondering voor è gat, was da we die film èn gemaakt voor de Rabobank want daar èn we toch mar mooie spullen an over gouwen, maar noe oor ik ze wee a praten over wee a nieuwe spullen, kan nie op zeker waar gaat da stoppen. Ke’n net koffie gedronken dus gaak weer verder, eerst op het vorige, want ak er nog is over nadienk geloof ik oek dat die nieuwe spullen der op den duur toch moeten kommen want zei m’n vader altied stilstand is achteruutgang, dus ga ma deur mannen we kunnen der alleen mar op verbeteren en is iedereen wee tevreeën (oop ik). 
Wak oek zo waardeer is de manier waarop de films van de leden worden besproken, je krieg kritiek das logisch, mar eerlijk is eerlijk meesta ist we op z’n plaats en ei der oek wat an, as ze zouen zeggen wat ei een mooie film gemaakt terwijl der nog wel het een en ander an kan verbeteren, zou je der niks an èn en zou joek nooit vooruut gaan, en ak zo es goed oplet moek we zeggen dat ter a vee flink vooruut zien gegaan deur die, zo as ze da zo mooi zeggen, opbouwende kritiek, mar tis we waa, we’n der ama wat an. Kiek das noe t’voordeel van de videoclub oor ik vaak zeggen, maar tis nog waar oek Kvin da we best oek een leuk clublokaal èn, dat doe oek vee oor, kmoe we toegeven dat nie zo centraal is, ma vin mar is iets da net zo goed is as di, en mee karpoelen kom je tegenwoordig een ende or. En wat de leden betreft, ach jetter altied wè die an zeuren, val meesta we mee oor, en ak dan na mezelf kiek dienk ik hou jie je mond ma want je kan ter oek wa van. Wa koek altied iil leuk vin is dien avond da onze wuven en venters mee mogen kommen en dan maggen ze nog zeggen welke film de besten is oek, nou die kieken der wel even anders na as wudder oor da bliek wè, mar tis wè leutig. Ai daar is goed over nadienk, wudder zitten ama te mieren over oe het wè en nie moe en dan blieken die partners, zo as ze da zeggen, mee iil andere ogen te kieken dan d’onze, dan dienk ik welles das toch eigenluk het publiek, oe zit et noe eigenluk, wie et ter noe geliek. Ik dienk zelf da we daar nooit uut zullen kommen want ut publiek zien uuteindeluk mar consumenten en wudder bin de filmer mee onze eigen kreatieviteit, ahum, en zo ist en nie anders. Kiek op zon manier ei altied gliek en beije vant gezeur af en kun we lekker wee verder op onze eigen manier, of……….. moe me der toch es over nadienken. Ik ga der in ieder geval es over nadienken en ak noe nie te vee kritiek krieg schrief ik de volgende keer misschien wee wè een stukje. De groetjes van 000X